khel-tamasha

Dam Dam Dam Dam Damrū baaje

bachche paas galī meñ bhāge

khel dikhā.e bhālū vaalā

rang jamā.e bhālū vaalā

chham-chham bhālū ghuum rahā hai

bachcha bachcha jhuum rahā hai

kartab ḳhuub dikhā.e bhālū

sab kā dil bahlā.e bhālū

ujlā ujlā suiT pahan kar

kaale kaale boot pahan kar

kursī par ārām kare hai

urdu kā aḳhbār paḌhe hai

ġhaur se filmī gaanā suntā

giit ġhazal dīvāna suntā

jab bhālū se kahe madārī

ghar vaalī hai kahāñ tumhārī

bhālū kursī se uTh jaa.e

apnā kuchh sāmān uThā.e

ab bhālū sasurāl chalā hai

saj-dhaj kar bhopal chalā hai

biivī maike ruuTh ga.ī hai

us kī qismat phuuT ga.ī hai

jā kar use manā.e bhālū

samjhā kar ghar laa.e bhālū

kuchh pal phir ārām se guzre

hañste gaate khāte piite

begam thī par ḳhuub laḌākū

ġhusse meñ hotī be-qābū

bātoñ bātoñ meñ khaTpaT ho

shauhar biivī kī jhanjhaT ho

biivī chīḳhe aur chillā.e

bhālū us par ro.ab jamā.e

hañs hañs ke behāl hue sab

biivī us kī bhaag ga.ī jab

bhālū gum-sum baiTh gayā hai

khel-tamāshā ḳhatm huā hai

Dam Dam Dam Dam Damru baje

bachche pas gali mein bhage

khel dikhae bhaalu wala

rang jamae bhaalu wala

chham-chham bhaalu ghum raha hai

bachcha bachcha jhum raha hai

kartab KHub dikhae bhaalu

sab ka dil bahlae bhaalu

ujla ujla suiT pahan kar

kale kale boot pahan kar

kursi par aaram kare hai

urdu ka aKHbar paDhe hai

ghaur se filmi gana sunta

git ghazal diwana sunta

jab bhaalu se kahe madari

ghar wali hai kahan tumhaari

bhaalu kursi se uTh jae

apna kuchh saman uThae

ab bhaalu sasural chala hai

saj-dhaj kar bhopal chala hai

biwi maike ruTh gai hai

us ki qismat phuT gai hai

ja kar use manae bhaalu

samjha kar ghar lae bhaalu

kuchh pal phir aaram se guzre

hanste gate khate pite

begam thi par KHub laDaku

ghusse mein hoti be-qabu

baaton baaton mein khaTpaT ho

shauhar biwi ki jhanjhaT ho

biwi chiKHe aur chillae

bhaalu us par roab jamae

hans hans ke behaal hue sab

biwi us ki bhag gai jab

bhaalu gum-sum baiTh gaya hai

khel-tamasha KHatm hua hai