khilaune

chune maiñ ne maujoñ se motī javāhir se jyotī bahāroñ se raag

liye maiñ ne ḳhoshoñ se ḳhushbū ke toshe

ulaT kar nigāhoñ se rāhoñ ke goshe

baḌhā maiñ chalā maiñ liye saath sāvan kī purvā chanāroñ kī aag bahāroñ ke raag

na kaam aa.e maujoñ ke motī javāhir kī jyotī na ḳhushbū na raag

muqaddar meñ paiham nujūm-e-shab-e-ġham

masarrat kā mātam musībat kā aalam

vo saare ḳhazīne ḳhizāoñ ne chhīne ki siine meñ hai ab chanāroñ kī aag na ḳhushbū na raag

milīñ ġham kī maujeñ masā.ib kī faujeñ rag-o-pai ke andar samundar ke raag

haqā.eq ke zindāñ meñ hairāñ pareshāñ

tasavvur taḳhayyul tanaffus se nālāñ

mujhī ko lagāne bujhāne ko paa.ī jahāñ ne suhāne chanāroñ kī aag samundar ke raag

magar tere dāman meñ phūloñ ke maskan meñ suntā huuñ aksar bahāroñ ke raag

tire narm ḳhoshe mohabbat ke toshe

mire bhole-bhāle hasīñ dil ke goshe

mire ranj-o-ġham mere fikr-o-alam ko dikhāte haiñ aakar chanāroñ kī aag sitāroñ kī aag

chune main ne maujon se moti jawahir se jyoti bahaaron se rag

liye main ne KHoshon se KHushbu ke toshe

ulaT kar nigahon se rahon ke goshe

baDha main chala main liye sath sawan ki purwa chanaron ki aag bahaaron ke rag

na kaam aae maujon ke moti jawahir ki jyoti na KHushbu na rag

muqaddar mein paiham nujum-e-shab-e-gham

masarrat ka matam musibat ka aalam

wo sare KHazine KHizaon ne chhine ki sine mein hai ab chanaron ki aag na KHushbu na rag

milin gham ki maujen masaib ki faujen rag-o-pai ke andar samundar ke rag

haqaeq ke zindan mein hairan pareshan

tasawwur taKHayyul tanaffus se nalan

mujhi ko lagane bujhane ko pai jahan ne suhane chanaron ki aag samundar ke rag

magar tere daman mein phulon ke maskan mein sunta hun aksar bahaaron ke rag

tere narm KHoshe mohabbat ke toshe

mere bhole-bhaale hasin dil ke goshe

mere ranj-o-gham mere fikr-o-alam ko dikhate hain aakar chanaron ki aag sitaron ki aag