KHiraj-e-‘aqidat

tirā sog ai dost kaise manā.ūñ

karūñ pesh kyā maiñ ḳhirāj-e-‘aqīdat

maiñ us ke liye kaise aañsū bahā.ūñ

sabhī ko hañsāne kī thī jis kī hasrat

bahut ham ko pyārā thā tū dost lekin

ḳhudā ko thī tujh se mohabbat ziyāda

yahī soch kar ab kiyā sabr ham ne

hai jannat meñ terī zarūrat ziyāda

bharā thā halāhal se go kanTh terā

laboñ se barastī thī amrit kī dhārā

rahā poñchhtā sab ke aañsū tū lekin

na apne ġhamoñ kā kiyā tū ne chāra

ḳhushī jo milī baañT dī dostoñ meñ

ġhamoñ ko kaleje se rakkhā lagā ke

zamāne kī ḳhātir rahā muskurātā

tū har dard siine meñ apne chhupā ke

sadāqat ke raste pe chaltā rahā tū

ġharīboñ kī tū ne himāyat sadā kī

usūloñ kī ḳhātir laḌā tū musalsal

tire narm dil meñ thī himmat balā kī

tirī yaad aa.egī jab dost mere

to nam hoñgī āñkheñ har ik ham-navā kī

manā.eñgī barsoñ talak dost mātam

tirī yaad meñ vādiyāñ narmadā kī

na bhūlūñgā ehsān tere maiñ lekin

rahegī sadā tujh se dohrī shikāyat

baḌī der kī mujh se milne meñ tū ne

baḌī jald phir tū huā dost ruḳhsat

tirā sog ai dost kaise manā.ūñ

karūñ pesh kyā maiñ ḳhirāj-e-‘aqīdat

tera sog ai dost kaise manaun

karun pesh kya main KHiraj-e-‘aqidat

main us ke liye kaise aansu bahaun

sabhi ko hansane ki thi jis ki hasrat

bahut hum ko pyara tha tu dost lekin

KHuda ko thi tujh se mohabbat ziyaada

yahi soch kar ab kiya sabr hum ne

hai jannat mein teri zarurat ziyaada

bhara tha halahal se go kanTh tera

labon se barasti thi amrit ki dhaara

raha ponchhta sab ke aansu tu lekin

na apne ghamon ka kiya tu ne chaara

KHushi jo mili banT di doston mein

ghamon ko kaleje se rakkha laga ke

zamane ki KHatir raha muskuraata

tu har dard sine mein apne chhupa ke

sadaqat ke raste pe chalta raha tu

gharibon ki tu ne himayat sada ki

usulon ki KHatir laDa tu musalsal

tere narm dil mein thi himmat bala ki

teri yaad aaegi jab dost mere

to nam hongi aankhen har ek ham-nawa ki

manaengi barson talak dost matam

teri yaad mein wadiyan narmada ki

na bhulunga ehsan tere main lekin

rahegi sada tujh se dohri shikayat

baDi der ki mujh se milne mein tu ne

baDi jald phir tu hua dost ruKHsat

tera sog ai dost kaise manaun

karun pesh kya main KHiraj-e-‘aqidat