KHizan ke phul

ye tangnā-e-qafas ye siyāsat-e-sayyād

ye āb-o-gil ke talātum yeh vus.at-e-barbād

ye tīrgī ye dil-e-mehr-o-māh kī dhaḌkan

ye āñsūoñ ke sitāre ye ismatoñ ke kafan

ye bhīgtī huī palkeñ ye TūTte hue dil

ye reg-zār-e-haqīqat ye parda-e-mahmil

ye chīḳhtī huī rūheñ ye hasratoñ ke sanam

ye bazm-e-kufr-o-yaqīñ ye jahān-e-dair-o-haram

ye shor-e-hashr ye paikār-e-sub.ha-o-zunnār

ye jāñ-gudāz fazā.eñ ye rūh-soz bahār

ye āñdhiy.oñ kī qatāreñ ye kārvān-e-hayāt

na pūchh kitne shagūfe haiñ markaz-e-āfāt

savād-e-zīst meñ tūfān aa.e haiñ kyā kyā

charāġh-e-sidq-o-safā jhilmilā.e haiñ kyā kyā

ayāġh chhūT paḌe mai-kashoñ ke hāthoñ se

ayaañ diloñ kī siyāhī hai kitne hāthoñ se

nigal chukī shab-e-ġham kin sahar-shikāroñ ko

ki zalzaloñ ne jagāyā hai fitna-zāroñ ko

hayāt marg-e-mohabbat pe nauha-ḳhvāñ hai abhī

vahī fasāna-e-iflās jāñ-sitāñ hai abhī

udās-udās sī rāteñ thake-thake se nujūm

ye abr-o-bād kī yūrish ye bijliyoñ kā hujūm

ye tiira bazm-e-jahāñ ye shikast-e-qalb-o-nazar

mahal banā.e haiñ qārūniyoñ ne lāshoñ par

diloñ pe yaas ke hote rahe sitam kyā kyā

karāhte rahe zulfoñ ke pech-o-ḳham kyā kyā

dayār-e-shauq meñ gūñje haiñ marsiye kitne

bujhā ga.ī hai nasīm-e-sahar diye kitne

vahī sadāqat-o-ehsās ke janāze haiñ

izār-e-gang-o-jaman par lahū ke ġhāze haiñ

vahī ḳhudā haiñ vahī but vahī rasūl abhī

samanistāñ meñ haiñ baaqī ḳhizāñ ke phuul abhī

chaman hazār sumūm-e-ḳhizāñ se khele haiñ

magar hanūz vahī bebasī ke mele haiñ

ye tangna-e-qafas ye siyasat-e-sayyaad

ye aab-o-gil ke talatum yeh wusat-e-barbaad

ye tirgi ye dil-e-mehr-o-mah ki dhaDkan

ye aansuon ke sitare ye ismaton ke kafan

ye bhigti hui palken ye TuTte hue dil

ye reg-zar-e-haqiqat ye parda-e-mahmil

ye chiKHti hui ruhen ye hasraton ke sanam

ye bazm-e-kufr-o-yaqin ye jahan-e-dair-o-haram

ye shor-e-hashr ye paikar-e-subha-o-zunnar

ye jaan-gudaz fazaen ye ruh-soz bahaar

ye aandhiyon ki qataren ye karwan-e-hayat

na puchh kitne shagufe hain markaz-e-afat

sawad-e-zist mein tufan aae hain kya kya

charagh-e-sidq-o-safa jhilmilae hain kya kya

ayagh chhuT paDe mai-kashon ke hathon se

ayan dilon ki siyahi hai kitne hathon se

nigal chuki shab-e-gham kin sahar-shikaron ko

ki zalzalon ne jagaya hai fitna-zaron ko

hayat marg-e-mohabbat pe nauha-KHwan hai abhi

wahi fasana-e-iflas jaan-sitan hai abhi

udas-udas si raaten thake-thake se nujum

ye abr-o-baad ki yurish ye bijliyon ka hujum

ye tera bazm-e-jahan ye shikast-e-qalb-o-nazar

mahal banae hain qaruniyon ne lashon par

dilon pe yas ke hote rahe sitam kya kya

karahte rahe zulfon ke pech-o-KHam kya kya

dayar-e-shauq mein gunje hain marsiye kitne

bujha gai hai nasim-e-sahar diye kitne

wahi sadaqat-o-ehsas ke janaze hain

izar-e-gang-o-jaman par lahu ke ghaze hain

wahi KHuda hain wahi but wahi rasul abhi

samanistan mein hain baqi KHizan ke phul abhi

chaman hazar sumum-e-KHizan se khele hain

magar hanuz wahi bebasi ke mele hain