KHizan-nasibon pe bain karti hui hawaen

lahū kī pyāsī barahna teġhoñ ko ye patā hai

chamakte ḳhanjar ye jānte haiñ

ki shāhzādī kī laġhzishoñ se

ġhulām shāhī kī jur.atoñ se

haram kī hurmat kā ḳhuuñ huā hai

mahal kī azmat kā ḳhuuñ huā hai

sharāfatoñ aur najābatoñ ke charāġh-o-mahtāb bujh ga.e haiñ

ba-nām-e-ulfat

ye aag kaisī huī hai raushan ki tāq-o-mehrāb bujh ga.e haiñ

hurūf-e-ismat the jin se raushan

vo saare e.arāb bujh ga.e haiñ

shujā.atoñ ke amīn-e-lashkar nazar jhukā.e khaḌe hue haiñ

bas ik ishāre ke muntazir hai tabar uThā.e khaḌe hue haiñ

ba-nām-e-izzat

ba-hukm-e-shāhī

bas ek shab meñ

barahna teġhoñ ne saare manzar badal diye haiñ

fasīl-e-qasr-e-anā ke nīche vafā kī lāsheñ paḌī huī haiñ

javāñ-mohabbat kī garm lāshoñ pe kaun ro.e

ki ḳhauf-e-shāhī se bazm-e-girya ke saare ādāb bujh ga.e haiñ

koī ḳhilāf-e-sitam nahīñ hai

kisī ko rañj-o-alam nahīñ hai

zarā bhī ḳhauf-e-adam nahīñ hai

kisī kī āñkheñ bhī nam nahīñ haiñ

sitam bhī chup hai jafā bhī chup hai

tilism-e-dasht-e-navā bhī chup hai

fasīl-e-shahr-e-anā bhī chup hai

zabān-e-ḳhalq-e-ḳhudā bhī chup hai

magar lahū hai ki boltā hai

ḳhizāñ-nasīboñ pe bain kartī huī havā.eñ

junūn-o-ḳhūñ kī mahak se labrez ye fazā.eñ

samā.atoñ meñ shigāf kartī huī sadā.eñ

batā rahī haiñ

anā ke ḳhūñ-nāb āñsuoñ meñ

vafā ke sab ḳhvāb bujh ga.e haiñ

lahu ki pyasi barahna teghon ko ye pata hai

chamakte KHanjar ye jaante hain

ki shahzadi ki laghzishon se

ghulam shahi ki juraton se

haram ki hurmat ka KHun hua hai

mahal ki azmat ka KHun hua hai

sharafaton aur najabaton ke charagh-o-mahtab bujh gae hain

ba-nam-e-ulfat

ye aag kaisi hui hai raushan ki taq-o-mehrab bujh gae hain

huruf-e-ismat the jin se raushan

wo sare earab bujh gae hain

shujaaton ke amin-e-lashkar nazar jhukae khaDe hue hain

bas ek ishaare ke muntazir hai tabar uThae khaDe hue hain

ba-nam-e-izzat

ba-hukm-e-shahi

bas ek shab mein

barahna teghon ne sare manzar badal diye hain

fasil-e-qasr-e-ana ke niche wafa ki lashen paDi hui hain

jawan-mohabbat ki garm lashon pe kaun roe

ki KHauf-e-shahi se bazm-e-girya ke sare aadab bujh gae hain

koi KHilaf-e-sitam nahin hai

kisi ko ranj-o-alam nahin hai

zara bhi KHauf-e-adam nahin hai

kisi ki aankhen bhi nam nahin hain

sitam bhi chup hai jafa bhi chup hai

tilism-e-dasht-e-nawa bhi chup hai

fasil-e-shahr-e-ana bhi chup hai

zaban-e-KHalq-e-KHuda bhi chup hai

magar lahu hai ki bolta hai

KHizan-nasibon pe bain karti hui hawaen

junun-o-KHun ki mahak se labrez ye fazaen

samaaton mein shigaf karti hui sadaen

bata rahi hain

ana ke KHun-nab aansuon mein

wafa ke sab KHwab bujh gae hain