khoe hue lamhe

vo mai-kada-e-husn pe umDā huā bādal

barsāt kī rātoñ meñ vo bajtā huā chhāgal

rangīn shaboñ meñ vo tirī chheḌ musalsal

har samt vo rūmān ke bahte hue dhāre

kyā ho ga.e rangīn vo lamhāt hamāre

vo nuur kā tūfān uThātī huī rāteñ

ḳhvābīda tamanna ko jagātī huī rāteñ

vo kaif meñ Duubī huī gaatī huī rāteñ

vo charḳh-e-mohabbat se baraste hue taare

kyā ho ga.e rangīn vo lamhāt hamāre

doharāo phir afsāna-e-āġhāz-e-mohabbat

phir gardish-e-sāġhar se chhiḌe sāz-e-mohabbat

phir raaz na aapas meñ rahe rāz-e-mohabbat

phir aao chaleñ sair ko dariyā ke kināre

kyā ho ga.e rangīn vo lamhāt hamāre

har-gām pe vo barq girāte hue chalnā

vo be-ḳhud-o-mad.hosh banā.e hue chalnā

vo sharm se āñchal ko dabāte hue chalnā

chitvan se ayaañ husn ke ma.asūm ishāre

kyā ho ga.e rangīn vo lamhāt hamāre

phir saarī fazā raham kī bastī nazar aa.e

har shai meñ samā.ī huī mastī nazar aa.e

har samt mohabbat hī barastī nazar aa.e

kyoñ chhup ga.e nazroñ se vo mahbūb nazzāre

kyā ho ga.e rangīn vo lamhāt hamāre

wo mai-kada-e-husn pe umDa hua baadal

barsat ki raaton mein wo bajta hua chhagal

rangin shabon mein wo teri chheD musalsal

har samt wo ruman ke bahte hue dhaare

kya ho gae rangin wo lamhat hamare

wo nur ka tufan uThati hui raaten

KHwabida tamanna ko jagati hui raaten

wo kaif mein Dubi hui gati hui raaten

wo charKH-e-mohabbat se baraste hue tare

kya ho gae rangin wo lamhat hamare

doharao phir afsana-e-aghaz-e-mohabbat

phir gardish-e-saghar se chhiDe saz-e-mohabbat

phir raaz na aapas mein rahe raaz-e-mohabbat

phir aao chalen sair ko dariya ke kinare

kya ho gae rangin wo lamhat hamare

har-gam pe wo barq giraate hue chalna

wo be-KHud-o-madhosh banae hue chalna

wo sharm se aanchal ko dabaate hue chalna

chitwan se ayan husn ke masum ishaare

kya ho gae rangin wo lamhat hamare

phir sari faza raham ki basti nazar aae

har shai mein samai hui masti nazar aae

har samt mohabbat hi barasti nazar aae

kyon chhup gae nazron se wo mahbub nazzare

kya ho gae rangin wo lamhat hamare