khoj

kabhī kabhī mirā bachcha savāl kartā hai

zamīn kaise banī hai ye āsmāñ kyā hai

huā thā chāñd sitāroñ kā janm kis san meñ

ab is ko kaun batā.e ki ye jahāñ kyā hai

ye vo savāl haiñ jo lā-javāb karte haiñ

baḌe baḌoñ kī bhī jin se ki aql ho hairāñ

azal se jin kī haqīqat rahī hai parde meñ

jinheñ samajh na sakā koī fāzil-e-daurāñ

ye zindagī vo samundar hai jis ke rele meñ

bahe hī jaate haiñ insān ḳhār-o-ḳhas kī tarah

magar hayāt kī rangīniyoñ pe marte haiñ

raqīq shahd meñ Duubī huī magas kī tarah

ajiib khel hai duniyā kā jis meñ gum hai bashar

na jaane rabt baḌhātā hai kis liye zar se

vo sochtā nahīñ aish us kā rang lā.egā

bachā hai kaun jahāñ meñ fanā ke ḳhanjar se

burā amal ho ki achchhā ye sab ko ḳhvāhish hai

kisī tarah to mile kaif-e-sarmadī ham ko

ye baat sochte rahte haiñ ahl-e-fikr-o-nazar

milī hai kis liye āḳhir ye zindagī ham ko

kabhi kabhi mera bachcha sawal karta hai

zamin kaise bani hai ye aasman kya hai

hua tha chand sitaron ka janm kis san mein

ab is ko kaun batae ki ye jahan kya hai

ye wo sawal hain jo la-jawab karte hain

baDe baDon ki bhi jin se ki aql ho hairan

azal se jin ki haqiqat rahi hai parde mein

jinhen samajh na saka koi fazil-e-dauran

ye zindagi wo samundar hai jis ke rele mein

bahe hi jate hain insan KHar-o-KHas ki tarah

magar hayat ki ranginiyon pe marte hain

raqiq shahd mein Dubi hui magas ki tarah

ajib khel hai duniya ka jis mein gum hai bashar

na jaane rabt baDhata hai kis liye zar se

wo sochta nahin aish us ka rang laega

bacha hai kaun jahan mein fana ke KHanjar se

bura amal ho ki achchha ye sab ko KHwahish hai

kisi tarah to mile kaif-e-sarmadi hum ko

ye baat sochte rahte hain ahl-e-fikr-o-nazar

mili hai kis liye aaKHir ye zindagi hum ko