khoj

maiñ apnā naam aur paidā.ish

khoj rahī huuñ

ek aisī ḳhurdbīn se

jis meñ

pachchīsvīñ sadī kī āñkheñ

lagī huī haiñ

vo āñkheñ jin kī putlī safed

aur saklīrā siyāh hai

vo āñkheñ jo duur tak

dekh saktī haiñ aur

āTHvāñ rañg pahchān saktī haiñ

jinheñ bā.isvīñ sadī ne

daryāft karne kā da.avā kiyā thā

magar ye alamiya

jis kī kokh

vaqt ke vajūd se ḳhālī hai

merī paidā.ish ke lamhe ko

kisī calender meñ

nishān-zad karne se qāsir hai

shāyad merā janm

tiin sau saḌsaThveñ din ke

kisī ġhair-matbūa lamhe meñ huā thā

jise tash.hīr karte hue

ḳhudā-e-aslī

apnī lā-mahdūdiat kī duhā.ī detā rahā

aur ḳhirāj letā rahā

magar phir

pluto kī sard aaheñ ḳhāmosh ho ga.iiñ

surḳh patthar vaale

surḳh pattharoñ meñ chun diye ga.e

vajūdiyat

pā-shikasta vajūd se

mā-ba.ad-vajūdiyat kī

tāvīleñ gaḌhtī rahī

aur maiñ

apnī khoj ke pātāl meñ

janmoñ kī kahānī dohrāte dohrāte

nizām-e-shamsī ke dā.ere se

bāhar jā paḌī

be-kināriyat ke samundar meñ

jahāñ har natīja sifar hai

main apna nam aur paidaish

khoj rahi hun

ek aisi KHurdbin se

jis mein

pachchiswin sadi ki aankhen

lagi hui hain

wo aankhen jin ki putli safed

aur saklira siyah hai

wo aankhen jo dur tak

dekh sakti hain aur

aaTHwan rang pahchan sakti hain

jinhen baiswin sadi ne

daryaft karne ka dawa kiya tha

magar ye alamiya

jis ki kokh

waqt ke wajud se KHali hai

meri paidaish ke lamhe ko

kisi calender mein

nishan-zad karne se qasir hai

shayad mera janm

tin sau saDsaThwen din ke

kisi ghair-matbua lamhe mein hua tha

jise tashhir karte hue

KHuda-e-asli

apni la-mahdudiat ki duhai deta raha

aur KHiraj leta raha

magar phir

pluto ki sard aahen KHamosh ho gain

surKH patthar wale

surKH pattharon mein chun diye gae

wajudiyat

pa-shikasta wajud se

ma-baad-wajudiyat ki

tawilen gaDhti rahi

aur main

apni khoj ke patal mein

janmon ki kahani dohraate dohraate

nizam-e-shamsi ke daere se

bahar ja paDi

be-kinariyat ke samundar mein

jahan har natija sifar hai