KHud-ehtisabi ki ek sham

ḳhudāyā

mujhe kyā huā hai

huā kyā hai āḳhir mujhe

ye kin vahshatoñ meñ shab-o-roz jiinā mirā ho rahā hai

mire qahqahoñ meñ ye kaisī udāsī mujhe Das rahī hai

mirī mahfiloñ meñ ye kis sūne-pan kī sadā chīḳhtī hai

mire dostoñ meñ ye kis dushmanī kī havāoñ ke jhakkaḌ mujhe khīñch kar

manzar-e-ām par lā rahe haiñ

mire dushmanoñ meñ mirī kaun sī bad-nasībī kā charchā huā hai

aqārib mire jo mirī dūriyoñ meñ bhī merī qarābat kā sukh DhūñDte the

vo ḳhāmosh haiñ

duur aur duur hote chale jā rahe haiñ

ḳhudāyā mujhe kyā huā hai

agar merā chehra badalne lagā hai

agar merī pahchān khone lagī hai

agar merī āvāz alag ho ga.ī hai

agar merī parchhā.īñ mere badan se hī Takrā rahī hai

mire ḳhvāb-zāroñ kā dariyā

agar merī vahshat kī galiyoñ meñ rusvā.iyoñ kī

ḳhazaf roltā hai

agar maiñ vahī huuñ

ki jo maiñ nahīñ huuñ

agar sach yahī hai ḳhudāyā

to bas itnā kar de

mirī dhund āñkhoñ meñ mere liye bhī koī aks bhar de

duā ke liye jab mire haath uTTheñ

to merī hathelī ko ā.īna kar de

KHudaya

mujhe kya hua hai

hua kya hai aaKHir mujhe

ye kin wahshaton mein shab-o-roz jina mera ho raha hai

mere qahqahon mein ye kaisi udasi mujhe Das rahi hai

meri mahfilon mein ye kis sune-pan ki sada chiKHti hai

mere doston mein ye kis dushmani ki hawaon ke jhakkaD mujhe khinch kar

manzar-e-am par la rahe hain

mere dushmanon mein meri kaun si bad-nasibi ka charcha hua hai

aqarib mere jo meri duriyon mein bhi meri qarabat ka sukh DhunDte the

wo KHamosh hain

dur aur dur hote chale ja rahe hain

KHudaya mujhe kya hua hai

agar mera chehra badalne laga hai

agar meri pahchan khone lagi hai

agar meri aawaz alag ho gai hai

agar meri parchhain mere badan se hi Takra rahi hai

mere KHwab-zaron ka dariya

agar meri wahshat ki galiyon mein ruswaiyon ki

KHazaf rolta hai

agar main wahi hun

ki jo main nahin hun

agar sach yahi hai KHudaya

to bas itna kar de

meri dhund aankhon mein mere liye bhi koi aks bhar de

dua ke liye jab mere hath uTThen

to meri hatheli ko aaina kar de