KHud-faroshi

kuchh ahl-e-chaman fasl-e-chaman bech rahe haiñ

zar ke liye nāmūs-e-vatan bech rahe haiñ

dushman haiñ ujāle ke ye zulmat ke parastār

phir sub.h-e-bahārāñ kī kiran bech rahe haiñ

jiinā jinheñ mehnat ke sahāre nahīñ aatā

tan bech rahe haiñ kabhī man bech rahe haiñ

ab maslahat-andesh hue ahl-e-junūñ bhī

shorīdgī-e-dār-o-rasan bech rahe haiñ

haq-goī meñ jo shohra-e-āfāq the kyā kyā

lab bech rahe haiñ vo dahan bech rahe haiñ

ik ahd se jo ābrū-e-bazm-e-suḳhan the

vo ābrū-e-sher-o-suḳhan bech rahe haiñ

yuuñ rehn haiñ maiḳhāne meñ ik jur.a-e-mai meñ

pākīzgī-e-gang-o-jaman bech rahe haiñ

badnām ho mai-ḳhāna bhī saaqī bhī ho rusvā

vo bāda-e-mai-ḳhāna-shikan bech rahe haiñ

kuchh ahl-e-chaman fasl-e-chaman bech rahe hain

zar ke liye namus-e-watan bech rahe hain

dushman hain ujale ke ye zulmat ke parastar

phir subh-e-bahaaran ki kiran bech rahe hain

jina jinhen mehnat ke sahaare nahin aata

tan bech rahe hain kabhi man bech rahe hain

ab maslahat-andesh hue ahl-e-junun bhi

shoridgi-e-dar-o-rasan bech rahe hain

haq-goi mein jo shohra-e-afaq the kya kya

lab bech rahe hain wo dahan bech rahe hain

ek ahd se jo aabru-e-bazm-e-suKHan the

wo aabru-e-sher-o-suKHan bech rahe hain

yun rehn hain maiKHane mein ek jura-e-mai mein

pakizgi-e-gang-o-jaman bech rahe hain

badnam ho mai-KHana bhi saqi bhi ho ruswa

wo baada-e-mai-KHana-shikan bech rahe hain