KHud-gharaz dost

dostī gīdaḌ se thī ik uuñT kī

rahte the jangal meñ donoñ saath hī

uuñT ne gīdaḌ se ik din yuuñ kahā

khet hai us paar naddī ke harā

neshkar jā kar vahāñ kuchh khā.eñge

peT bhar kar khet se phir ā.eñge

uuñT ne ye sun ke gīdaḌ se kahā

is se behtar baat ho saktī hai kyā

phir vahāñ se donoñ mil kar chal diye

aa ke pohñche jab kināre nahr ke

piiTh par baiThā thā gīdaḌ uuñT kī

is tarah donoñ ne naddī paar kī

khet meñ aa.e vo bāham yak-digar

so rahā thā us kā mālik be-ḳhabar

khet meñ be-ḳhauf ho kar ghus ga.e

neshkar ko toḌ kar khāte rahe

peT us gīdaḌ kā jis dam bhar gayā

uuñT se ho kar muḳhātib yuuñ kahā

ye mirī 'ādat hai achchhī yā burī

peT bhar jaatā hai merā jis ghaḌī

ḳhuub chillātā huuñ jab hotā huuñ sair

chīḳhne meñ phir nahīñ kartā huuñ der

kī ḳhushāmad uuñT ne aur yuuñ kahā

peT bhar jaane de merā Thahr jā

baat gīdaḌ ne na maanī zīnhār

ḳhuub chillāne lagā vo nābakār

us ne jab nā're lagā.e zor ke

jaag uTThā dahqāñ apnī niiñd se

ek lakḌī le ke dauḌā nā-gahāñ

us taraf the uuñT aur gīdaḌ jahāñ

us ko jab gīdaḌ ne dekhā dauḌtā

ho gayā ġhā.eb na Thahrā ik zarā

rah gayā jab uuñT akelā be-ḳhabar

lī ga.ī phir us kī DanDoñ se ḳhabar

ḳhuub hī piTtā huā nādāñ ġharīb

aa ke pahuñchā jab ki naddī ke qarīb

us ne dekhā us kā yār-e-bevafā

hai vahāñ pahle hī se aa kar khaḌā

dekh kar vo uuñT ko kahne lagā

shukr haq kā bach ga.ī jaan ai chachā

tum ko ġham karnā na hargiz chāhiye

lūñgā badla maiñ ḳhud us kambaḳht se

kuchh na bolā uuñT bas ḳhāmosh thā

aur us ko piiTh par apnī biThā

biich meñ naddī ke jab vo aa gayā

ham-safar gīdaḌ se yuuñ kahne lagā

dil meñ hai ġhota lagā.ūñ is ghaḌī

jānte haiñ sab ye 'ādat hai mirī

ye sunā to hosh us ke uḌ ga.e

phir ḳhushāmad se kahā yuuñ uuñT se

mujh ko tum pahuñchā do naddī se udhar

chāhe phir ġhote lagāo jis qadar

baat gīdaḌ kī na maanī uuñT ne

biich nadī meñ lagā vo Dūbne

bah gayā paanī meñ gīdaḌ chīḳhtā

uuñT ne is tarh badla le liyā

tum ne dekhā kis tarah hai uuñT kī

be-hayā gīdaḌ ke hāthoñ gat banī

ḳhud-ġharaz kī dostī achchhī nahīñ

vo phañsā degā tumheñ hazrat kahīñ

tum ko 'faizī' yaad rakhnā chāhiye

dostoñ se aise bachnā chāhiye

dosti gidaD se thi ek unT ki

rahte the jangal mein donon sath hi

unT ne gidaD se ek din yun kaha

khet hai us par naddi ke hara

neshkar ja kar wahan kuchh khaenge

peT bhar kar khet se phir aaenge

unT ne ye sun ke gidaD se kaha

is se behtar baat ho sakti hai kya

phir wahan se donon mil kar chal diye

aa ke pohnche jab kinare nahr ke

piTh par baiTha tha gidaD unT ki

is tarah donon ne naddi par ki

khet mein aae wo baham yak-digar

so raha tha us ka malik be-KHabar

khet mein be-KHauf ho kar ghus gae

neshkar ko toD kar khate rahe

peT us gidaD ka jis dam bhar gaya

unT se ho kar muKHatib yun kaha

ye meri 'adat hai achchhi ya buri

peT bhar jata hai mera jis ghaDi

KHub chillata hun jab hota hun sair

chiKHne mein phir nahin karta hun der

ki KHushamad unT ne aur yun kaha

peT bhar jaane de mera Thahr ja

baat gidaD ne na mani zinhaar

KHub chillane laga wo nabakar

us ne jab na're lagae zor ke

jag uTTha dahqan apni nind se

ek lakDi le ke dauDa na-gahan

us taraf the unT aur gidaD jahan

us ko jab gidaD ne dekha dauDta

ho gaya ghaeb na Thahra ek zara

rah gaya jab unT akela be-KHabar

li gai phir us ki DanDon se KHabar

KHub hi piTta hua nadan gharib

aa ke pahuncha jab ki naddi ke qarib

us ne dekha us ka yar-e-bewafa

hai wahan pahle hi se aa kar khaDa

dekh kar wo unT ko kahne laga

shukr haq ka bach gai jaan ai chacha

tum ko gham karna na hargiz chahiye

lunga badla main KHud us kambaKHt se

kuchh na bola unT bas KHamosh tha

aur us ko piTh par apni biTha

bich mein naddi ke jab wo aa gaya

ham-safar gidaD se yun kahne laga

dil mein hai ghota lagaun is ghaDi

jaante hain sab ye 'adat hai meri

ye suna to hosh us ke uD gae

phir KHushamad se kaha yun unT se

mujh ko tum pahuncha do naddi se udhar

chahe phir ghote lagao jis qadar

baat gidaD ki na mani unT ne

bich nadi mein laga wo Dubne

bah gaya pani mein gidaD chiKHta

unT ne is tarh badla le liya

tum ne dekha kis tarah hai unT ki

be-haya gidaD ke hathon gat bani

KHud-gharaz ki dosti achchhi nahin

wo phansa dega tumhein hazrat kahin

tum ko 'faizi' yaad rakhna chahiye

doston se aise bachna chahiye