KHud-kalami KHatun-e-KHana ki

kuchh ḳhaas nahīñ hai

vahī roz-o-shab haiñ

har din nayā din hai

aur din guzar jaanā hai

oh bachche schōl se aane vaale haiñ

aur bachchoñ ke liye lunch bhī banānā hai

sub.h nāshte meñ maiñ ghanchakkar banī hotī huuñ

Time kī kamī nāshta adhūrā chhoḌ jaane kā achchhā bahānā hai

are yaad hī na rahā saas kī davā ḳhatm hone vaalī hai

aur kitchen kā kuchh sāmān bhī laanā hai

baabā bīmār haiñ ka.ī dinoñ se ammī kī taraf jaanā hai

kapḌe dhone haiñ abhī shirt kā baTan Tañknā hai

kitnā achchhā mausam hai bādaloñ ke sañg gungunāne kā

magar dāvat hai kal aur raat kā khānā banānā hai

vo kah ga.e haiñ ghar bikhrā paḌā hai

dusting kyuuñ nahīñ kartī achchhe se mehmānoñ ne kal aanā hai

kabāb banā kar rakhe haiñ abhī frēze meñ

ab bachchoñ ko paḌhānā hai

cousin haspatāl meñ admit hai us kī ayādat ko jaanā hai

phuul kitne murjhā ga.e haiñ unheñ paanī lagānā hai

thak kar chuur ho ga.ī huuñ magar un ke liye

achchhe se tayyār honā hai

vo kahte haiñ pahle kitnī achchhī lagtī thiiñ aur ab

vaqt kī kamī bas ḳhayāl na rakhne kā bahāna hai

kuchh KHas nahin hai

wahi roz-o-shab hain

har din naya din hai

aur din guzar jaana hai

oh bachche school se aane wale hain

aur bachchon ke liye lunch bhi banana hai

subh nashte mein main ghanchakkar bani hoti hun

Time ki kami nashta adhura chhoD jaane ka achchha bahana hai

are yaad hi na raha sas ki dawa KHatm hone wali hai

aur kitchen ka kuchh saman bhi lana hai

baba bimar hain kai dinon se ammi ki taraf jaana hai

kapDe dhone hain abhi shirt ka baTan Tankna hai

kitna achchha mausam hai baadalon ke sang gungunane ka

magar dawat hai kal aur raat ka khana banana hai

wo kah gae hain ghar bikhra paDa hai

dusting kyun nahin karti achchhe se mehmanon ne kal aana hai

kabab bana kar rakhe hain abhi freeze mein

ab bachchon ko paDhana hai

cousin haspatal mein admit hai us ki ayaadat ko jaana hai

phul kitne murjha gae hain unhen pani lagana hai

thak kar chur ho gai hun magar un ke liye

achchhe se tayyar hona hai

wo kahte hain pahle kitni achchhi lagti thin aur ab

waqt ki kami bas KHayal na rakhne ka bahana hai