KHud-kushi

āḳhir ham is jahān meñ aa.e hī kis liye

sab log ham pe ek sī nazreñ jamā.e haiñ

jaise koī 'azīm gunahgār dekh leñ

aur sangsār karne kī taiyāriyoñ meñ hoñ

ye badtarīn log bahut badtarīn log

sab aane vāloñ ke liye ik mas.ala haiñ yaar

in ke hī rang meñ hameñ Dhal jaanā chāhiye

varna hamāre saath bhī tai hai ki ek roz

aanis mu'īn jaise ka.ī hādsāt hoñ

aur rafta rafta maut hī ham ko 'azīz ho

itnī 'azīz ho ki phir is ke surāġh meñ

asrār-e-āgahī ke hī pīchhe nikal paḌeñ

māyūsiyoñ ke ek libāde ko oḌh kar

sab hasratoñ ko dafn kareñ us ke baa'd ham

āḳhir meñ ek aur baḌā faisla kareñ

chaltī huī train ke aage hī kuud jaa.eñ

phir chand be-zamīroñ ko ehsās maar de

uTTheñ aur aise qissoñ ko paḌhnā shurū' kareñ

jo log yūñhī vaqt se pahle chale ga.e

aise bhī kyā sitam hue jin ke sabab ye log

ḳhud aap apnī ziist pe hī ḳhaak mal ga.e

āḳhir ko Dher saare natā.ej nikal ke aa.eñ

un par tavīl vaqt koī guftugū chale

un ke hayāt ke sabhī goshoñ pe baat ho

yak-laḳht ek shor sā barpā ho shahr meñ

us shor meñ bhī ik vahī pahlī sī baat ho

har shaḳhs ek duuje se kahtā huā phire

phir ek baar vaqt ne karvaT liyā hai aaj

kuchh chāl-bāz aaj kī baazī bhī le ga.e

sarvat husain naam ke shā'ir ko aaj phir

vahshat bhare jahān ne shāna nahīñ diyā

vo ek rail-gāḌī se jā kar lipaT ga.e

Dar hai ki apne saath bhī yuuñ hādisa na ho

ye log ham ko vaqt se pahle hī maar deñ

māyūsiyoñ ke rang bhī ham par utar na jaa.eñ

aur maut apne vāste jān-e-'azīz ho

paane ko us kā jalva-e-asrār-e-āgahī

phir rafta rafta yaar usī ke surāġh meñ

aisā na ho ki ham bhī kahīñ ḳhud-kushī kareñ

aaKHir hum is jahan mein aae hi kis liye

sab log hum pe ek si nazren jamae hain

jaise koi 'azim gunahgar dekh len

aur sangsar karne ki taiyariyon mein hon

ye badtarin log bahut badtarin log

sab aane walon ke liye ek masala hain yar

in ke hi rang mein hamein Dhal jaana chahiye

warna hamare sath bhi tai hai ki ek roz

aanis mu'in jaise kai hadsat hon

aur rafta rafta maut hi hum ko 'aziz ho

itni 'aziz ho ki phir is ke suragh mein

asrar-e-agahi ke hi pichhe nikal paDen

mayusiyon ke ek libaade ko oDh kar

sab hasraton ko dafn karen us ke ba'd hum

aaKHir mein ek aur baDa faisla karen

chalti hui train ke aage hi kud jaen

phir chand be-zamiron ko ehsas mar de

uTThen aur aise qisson ko paDhna shuru' karen

jo log yunhi waqt se pahle chale gae

aise bhi kya sitam hue jin ke sabab ye log

KHud aap apni zist pe hi KHak mal gae

aaKHir ko Dher sare nataej nikal ke aaen

un par tawil waqt koi guftugu chale

un ke hayat ke sabhi goshon pe baat ho

yak-laKHt ek shor sa barpa ho shahr mein

us shor mein bhi ek wahi pahli si baat ho

har shaKHs ek duje se kahta hua phire

phir ek bar waqt ne karwaT liya hai aaj

kuchh chaal-baz aaj ki bazi bhi le gae

sarwat husain nam ke sha'ir ko aaj phir

wahshat bhare jahan ne shana nahin diya

wo ek rail-gaDi se ja kar lipaT gae

Dar hai ki apne sath bhi yun hadisa na ho

ye log hum ko waqt se pahle hi mar den

mayusiyon ke rang bhi hum par utar na jaen

aur maut apne waste jaan-e-'aziz ho

pane ko us ka jalwa-e-asrar-e-agahi

phir rafta rafta yar usi ke suragh mein

aisa na ho ki hum bhi kahin KHud-kushi karen