KHuda gawah

ḳhudā gavāh dil ik lamha bhī nahīñ ġhāfil

tumhārī yaad bhī baaqī hai dukh bhī baaqī hai

vo shām-e-ġham bhī usī tarah dil pe qaa.em hai

vo roz-e-saḳht bhī siine meñ dard ban kar hai

jab ek hamla-e-dil tum pe zulm kartā thā

aziim shahr ke markaz meñ ik udaas sā ghar

ilaaj se mahrūm

tumhāre dukh meñ taḌapne ko dekh kar chup thā

to saare shāhī mahallāt shor-e-aish meñ the

mujhe to falsafa-e-sabr bhī gavārā hai

(agarche asl meñ ye qātiloñ kī mantiq hai)

magar ye falsafa us dil ko kaun samjhā.e

jo terī yaad ke ġham ko ḳhudā samajhtā hai

agar ga.e hue ik lamha muḌ ke aa sakte

fanā ke ba.ad dobāra hayāt agar hotī

to maiñ zarūr lipaT kar tumhāre siine se

tamām qissa-e-ġham āñ.suoñ meñ barsātā

magar mujhe to ḳhabar hai ki ye nahīñ mumkin

isī liye mire dil meñ alam bhī baaqī hai

tirī gihād-e-musalsal sī zindagī kī kitāb

mirī hayāt ke ik ik varaq pe likkhī hai

jo tū ne raah meñ chhoḌā thā parcham-e-tag-o-dau

harīf kuchh bhī kaheñ aaj mere haath meñ hai

qarār-e-ḳhātir-e-mahzūñ agar koī shai hai

to usī kā ḳhayāl!

KHuda gawah dil ek lamha bhi nahin ghafil

tumhaari yaad bhi baqi hai dukh bhi baqi hai

wo sham-e-gham bhi usi tarah dil pe qaem hai

wo roz-e-saKHt bhi sine mein dard ban kar hai

jab ek hamla-e-dil tum pe zulm karta tha

azim shahr ke markaz mein ek udas sa ghar

ilaj se mahrum

tumhaare dukh mein taDapne ko dekh kar chup tha

to sare shahi mahallat shor-e-aish mein the

mujhe to falsafa-e-sabr bhi gawara hai

(agarche asl mein ye qatilon ki mantiq hai)

magar ye falsafa us dil ko kaun samjhae

jo teri yaad ke gham ko KHuda samajhta hai

agar gae hue ek lamha muD ke aa sakte

fana ke baad dobara hayat agar hoti

to main zarur lipaT kar tumhaare sine se

tamam qissa-e-gham aansuon mein barsata

magar mujhe to KHabar hai ki ye nahin mumkin

isi liye mere dil mein alam bhi baqi hai

teri gihad-e-musalsal si zindagi ki kitab

meri hayat ke ek ek waraq pe likkhi hai

jo tu ne rah mein chhoDa tha parcham-e-tag-o-dau

harif kuchh bhi kahen aaj mere hath mein hai

qarar-e-KHatir-e-mahzun agar koi shai hai

to usi ka KHayal!