KHuda hamara hai

ḳhudā tumhārā nahīñ hai ḳhudā hamārā hai

use zamīn pe ye zulm kab gavārā hai

lahū piyoge kahāñ tak hamārā dhanvāno

baḌhāo apnī dukāñ sīm-o-zar ke dīvāno

nishāñ kahīñ na rahegā tumhārā shaitāno

hameñ yaqīñ hai ki insān us ko pyārā hai

ḳhudā tumhārā nahīñ hai ḳhudā hamārā hai

use zamīn pe ye zulm kab gavārā hai

na.e shu.ūr kī hai raushnī nigāhoñ meñ

ik aag sī bhī hai ab apnī sard aahoñ meñ

khileñge phuul nazar ke sahar kī bāñhoñ meñ

dukhe diloñ ko isī aas kā sahārā hai

ḳhudā tumhārā nahīñ hai ḳhudā hamārā hai

use zamīn pe ye zulm kab gavārā hai

tilism-e-sāya-e-ḳhauf-o-harās toḌeñge

qadam baḌhā.eñge zanjīr-e-yās toḌeñge

kabhī kisī ke na ham dil kī aas toḌeñge

rahegā yaad jo ahd-e-sitam guzārā hai

use zamīn pe ye zulm kab gavārā hai

KHuda tumhaara nahin hai KHuda hamara hai

use zamin pe ye zulm kab gawara hai

lahu piyoge kahan tak hamara dhanwano

baDhao apni dukan sim-o-zar ke diwano

nishan kahin na rahega tumhaara shaitano

hamein yaqin hai ki insan us ko pyara hai

KHuda tumhaara nahin hai KHuda hamara hai

use zamin pe ye zulm kab gawara hai

nae shuur ki hai raushni nigahon mein

ek aag si bhi hai ab apni sard aahon mein

khilenge phul nazar ke sahar ki banhon mein

dukhe dilon ko isi aas ka sahaara hai

KHuda tumhaara nahin hai KHuda hamara hai

use zamin pe ye zulm kab gawara hai

tilism-e-saya-e-KHauf-o-haras toDenge

qadam baDhaenge zanjir-e-yas toDenge

kabhi kisi ke na hum dil ki aas toDenge

rahega yaad jo ahd-e-sitam guzara hai

use zamin pe ye zulm kab gawara hai