KHuda ko kaam karne do

ḳhudā ko kaam karnā hai

ḳhudā ko kaam karne do

ye jo shaitān kī rassī ko us ne Dhiil dī hai

ek mansūba hai us kā

yaqīnan āsmāñ meñ

us ne apne apps kuchh aise

banā.e haiñ

jinheñ bar-vaqt download honā hai

vo sub.h anqarīb aa.egī

jab us kā farishta suur phūñkegā

abhī jo muTThiyoñ ko bhīñch kar

taqrīr karte haiñ

fazā meñ moTe moTe haath lahrā kar

tum ik din dekh pāoge

tumhārā rab

laboñ ko sī ke kin iqdām kī taiyāriyoñ meñ thā

vo harf-e-haq ko sābit kar ke chhoḌegā

in ahl-e-shar ke qadmoñ se zamīñ sarkegī

aur un kī moTī moTī muTThiyoñ se

dhoñs kī miTTī

ret kī mānind jhaḌ jā.egī

bahut be-tāb mat ho tum zarā Thahro

vo din aa.egā jab tum dekh pāoge

ye sab chaupāyoñ kā peshāb-o-gobar bechte rah jā.eñge

tumhāre paas shahriyat ke kāġhaz aap pahuñcheñge

tum duudh meñ Dubkī lagāoge

ḳhudā ko kaam karnā hai

ḳhudā ko kaam karne do

KHuda ko kaam karna hai

KHuda ko kaam karne do

ye jo shaitan ki rassi ko us ne Dhil di hai

ek mansuba hai us ka

yaqinan aasman mein

us ne apne apps kuchh aise

banae hain

jinhen bar-waqt download hona hai

wo subh anqarib aaegi

jab us ka farishta sur phunkega

abhi jo muTThiyon ko bhinch kar

taqrir karte hain

faza mein moTe moTe hath lahra kar

tum ek din dekh paoge

tumhaara rab

labon ko si ke kin iqdam ki taiyariyon mein tha

wo harf-e-haq ko sabit kar ke chhoDega

in ahl-e-shar ke qadmon se zamin sarkegi

aur un ki moTi moTi muTThiyon se

dhons ki miTTi

ret ki manind jhaD jaegi

bahut be-tab mat ho tum zara Thahro

wo din aaega jab tum dekh paoge

ye sab chaupayon ka peshab-o-gobar bechte rah jaenge

tumhaare pas shahriyat ke kaghaz aap pahunchenge

tum dudh mein Dubki lagaoge

KHuda ko kaam karna hai

KHuda ko kaam karne do