KHudi ka raaz

merī har fikr meñ tūfān kī tuġhyānī hai

aur mire shauq meñ jazboñ kī farāvānī hai

yuuñ junūñ bahtā hai dariyā kī ravānī jaise

aur mirī soch meñ paltī hai kahānī jaise

maiñ ne to himmat-e-mardān-e-ḳhudā sīkhī hai

maiñ ne TuuTe hue lahjoñ kī duā sīkhī hai

maiñ ne har rañg kī ḳhushbū kī adā sīkhī hai

maiñ ne har zāhir o bātil kā uThāyā parda

aur tasḳhīr-e-zamāna kī lagan dil meñ liye

apne hāthoñ meñ mashaqqat ke kaḌe pahne haiñ

maiñ ne har aql-o-ḳhirad fahm-o-farāsat kā sahārā le kar

yuuñ zamāne ko baratne ke hunar sīkhe haiñ

maiñ ne jaane haiñ sabhī rāz-e-nihāñ aur jahāñ

aur jaanā hai ḳhudī hai to makāñ merā hai

āsmāñ merā

zamīñ merī

jahāñ merā hai

meri har fikr mein tufan ki tughyani hai

aur mere shauq mein jazbon ki farawani hai

yun junun bahta hai dariya ki rawani jaise

aur meri soch mein palti hai kahani jaise

main ne to himmat-e-mardan-e-KHuda sikhi hai

main ne TuTe hue lahjon ki dua sikhi hai

main ne har rang ki KHushbu ki ada sikhi hai

main ne har zahir o baatil ka uThaya parda

aur tasKHir-e-zamana ki lagan dil mein liye

apne hathon mein mashaqqat ke kaDe pahne hain

main ne har aql-o-KHirad fahm-o-farasat ka sahaara le kar

yun zamane ko baratne ke hunar sikhe hain

main ne jaane hain sabhi raaz-e-nihan aur jahan

aur jaana hai KHudi hai to makan mera hai

aasman mera

zamin meri

jahan mera hai