KHurshid-e-mahshar ki lau

aaj ke din na pūchho mire dosto

duur kitne haiñ ḳhushiyāñ manāne ke din

khul ke hañsne ke din giit gaane ke din

pyaar karne ke din dil lagāne ke din

aaj ke din na pūchho mire dosto

zaḳhm kitne abhī baḳht-e-bismil meñ haiñ

dasht kitne abhī rāh-e-manzil meñ haiñ

tiir kitne abhī dast-e-qātil meñ haiñ

aaj kā din zubūñ hai mire dosto

aaj ke din to yuuñ hai mire dosto

jaise dard-o-alam ke purāne nishāñ

sab chale sū-e-dil kārvāñ kārvāñ

haath siine pe rakkho to har ustuḳhāñ

se uThe nāla-e-al-amāñ al-amāñ

aaj ke din na pūchho mire dosto

kab tumhāre lahū ke darīda alam

farq-e-ḳhurshīd-e-mahshar pe hoñge raqam

az-karāñ tā-karāñ kab tumhāre qadam

le ke uTThegā vo bahr-e-ḳhūñ yam ba yam

jis meñ dhul jā.egā aaj ke din kā ġham

saare dard-o-alam saare jaur-o-sitam

duur kitnī hai ḳhurshīd-e-mahshar kī lau

aaj ke din na pūchho mire dosto

aaj ke din na puchho mere dosto

dur kitne hain KHushiyan manane ke din

khul ke hansne ke din git gane ke din

pyar karne ke din dil lagane ke din

aaj ke din na puchho mere dosto

zaKHm kitne abhi baKHt-e-bismil mein hain

dasht kitne abhi rah-e-manzil mein hain

tir kitne abhi dast-e-qatil mein hain

aaj ka din zubun hai mere dosto

aaj ke din to yun hai mere dosto

jaise dard-o-alam ke purane nishan

sab chale su-e-dil karwan karwan

hath sine pe rakkho to har ustuKHan

se uThe nala-e-al-aman al-aman

aaj ke din na puchho mere dosto

kab tumhaare lahu ke darida alam

farq-e-KHurshid-e-mahshar pe honge raqam

az-karan ta-karan kab tumhaare qadam

le ke uTThega wo bahr-e-KHun yam ba yam

jis mein dhul jaega aaj ke din ka gham

sare dard-o-alam sare jaur-o-sitam

dur kitni hai KHurshid-e-mahshar ki lau

aaj ke din na puchho mere dosto