KHushbu ka safar

merī maañ maut kī āġhosh meñ bhī ḳhūbsūrat thī

mujassam shukr-o-īsār-o-vafā

jo zindagī-bhar ḳhud jhulas kar ham ko ThanDī chhāñv dī thī

ab us kī chāñd sī raushan jabīñ par

dard kī gahrī shikan sī aa ga.ī thī

phir bhī us kā zard chehra pur-sukūñ thā

vo jab tak hosh meñ thā

us ke hoñToñ par duā.eñ

us kī āñkhoñ meñ mohabbat thī

mirī maañ maut kī āġhosh meñ bhī ḳhūbsūrat thī

use ik dūsrī duniyā meñ paidā.ish kī jaldī thī

hameñ ye zid ki ham ko chhoḌ kar jaane nahīñ paa.e

usī rassa-kashī meñ

us kā dil aur jism

us ke hoñT us kī ruuh zaḳhmī ho chuke the

chhil chuke the

phir bhī us ne apnā saarā bojh

us palḌe meñ Daalā thā

jahāñ ham sab ikaTThe mil ke us ko apnī duniyā

apnī is be-faiz duniyā meñ ghasīTe jā rahe the

hameñ ma.alūm thā

ye jang haarī jā chukī hai

sab masīhāoñ ke chehroñ par nadāmat hai

ajal ne āfiyat ke saare aDDe phūñk Daale haiñ

magar maidān se paspā.ī kā rasta nahiñ thā

ham us kā haath thāme

un laraztī uñgliyoñ se sabr aur ummīd kā paiġhām sunte the

magar hāthoñ se vo aise nikaltī jā rahī thī

ki jaise bādaloñ kī oT meñ

Dhalte ho.e mahtāb kā paikar saraktā ho

yā koī dast-o-pā saare gañvā kar

āḳhirash mashkīza-e-jāñ apne dāñtoñ se uThā.e

tiir khātā jā rahā ho

aur use ma.alūm ho ḳheme talak aanā nahīñ mumkin

sināñ dil meñ tarāzū ho to sab nā-chār girte haiñ

savāroñ kā to kyā mazkūr hai

rahvār girte haiñ

so vo dast-e-qazā thāme hue ruḳhsat huī ham se

ab ham kab batā paa.e

hameñ us kī abhī kitnī zarūrat thī

mirī maañ baaqī saarī maaoñ jaisī ḳhūb-sūrat thī

meri man maut ki aaghosh mein bhi KHubsurat thi

mujassam shukr-o-isar-o-wafa

jo zindagi-bhar KHud jhulas kar hum ko ThanDi chhanw di thi

ab us ki chand si raushan jabin par

dard ki gahri shikan si aa gai thi

phir bhi us ka zard chehra pur-sukun tha

wo jab tak hosh mein tha

us ke honTon par duaen

us ki aankhon mein mohabbat thi

meri man maut ki aaghosh mein bhi KHubsurat thi

use ek dusri duniya mein paidaish ki jaldi thi

hamein ye zid ki hum ko chhoD kar jaane nahin pae

usi rassa-kashi mein

us ka dil aur jism

us ke honT us ki ruh zaKHmi ho chuke the

chhil chuke the

phir bhi us ne apna sara bojh

us palDe mein Dala tha

jahan hum sab ikaTThe mil ke us ko apni duniya

apni is be-faiz duniya mein ghasiTe ja rahe the

hamein malum tha

ye jang haari ja chuki hai

sab masihaon ke chehron par nadamat hai

ajal ne aafiyat ke sare aDDe phunk Dale hain

magar maidan se paspai ka rasta nahin tha

hum us ka hath thame

un larazti ungliyon se sabr aur ummid ka paigham sunte the

magar hathon se wo aise nikalti ja rahi thi

ki jaise baadalon ki oT mein

Dhalte hoe mahtab ka paikar sarakta ho

ya koi dast-o-pa sare ganwa kar

aaKHirash mashkiza-e-jaan apne danton se uThae

tir khata ja raha ho

aur use malum ho KHeme talak aana nahin mumkin

sinan dil mein taraazu ho to sab na-chaar girte hain

sawaron ka to kya mazkur hai

rahwar girte hain

so wo dast-e-qaza thame hue ruKHsat hui hum se

ab hum kab bata pae

hamein us ki abhi kitni zarurat thi

meri man baqi sari maon jaisi KHub-surat thi