KHushbu

koī ḳhushbū sī

ḳhalāoñ ke gahre ghane jañgaloñ meñ chhupī dekhtī hai

ziddī bachche ko jis kā khilaunā nirī dhuul se aT gayā hai

us ke chāñd aur sūraj miTTī meñ rul-mil ga.e haiñ

ghar meñ sannāTā phailā huā hai

kivāḌoñ kī bārīk jhurriyoñ ke pīchhe

koī

paak ma.abūd kī narm āġhosh meñ jal rahā hai

abhī ek lamhe ke zer-e-asar

yakāyak kisī ne zamīñ se bahut duur ūñchā.ī vaale makāñ se

apnī āñkhoñ ke sho.aloñ ko jhaTkā diyā hai

megh kaale barasne lage haiñ

aur ziddī bachcha

miTTī meñ machlā huā

thakele bhare bāzuoñ vaalī maañ ke badan meñ

subakne lagā hai

koi KHushbu si

KHalaon ke gahre ghane jangalon mein chhupi dekhti hai

ziddi bachche ko jis ka khilauna niri dhul se aT gaya hai

us ke chand aur suraj miTTi mein rul-mil gae hain

ghar mein sannaTa phaila hua hai

kiwaDon ki barik jhurriyon ke pichhe

koi

pak mabud ki narm aaghosh mein jal raha hai

abhi ek lamhe ke zer-e-asar

yakayak kisi ne zamin se bahut dur unchai wale makan se

apni aankhon ke shoalon ko jhaTka diya hai

megh kale barasne lage hain

aur ziddi bachcha

miTTi mein machla hua

thakele bhare bazuon wali man ke badan mein

subakne laga hai