خون تمنا

جل چکی شاخ نشیمن تھم چکی باد سموم

اب ہوائے نو بہاراں کوثر افشاں ہے تو کیا

کر چکی خون تمنا تیرگیٔ شام غم

آسماں پر اب نیا سورج درخشاں ہے تو کیا

جام افسردہ صراحی سرنگوں مینا خموش

میکدے میں اب ہجوم مے گساراں ہے تو کیا

دور ہو سکتا نہیں اے دوست قرنوں کا سکوت

زندگی اب اپنے بربط پر غزل خواں ہے تو کیا

گردش دوراں پہ کوئی فتح پا سکتا نہیں

تیرے لب پر شکوۂ آلام دوراں ہے تو کیا

منکشف ہونے کو ہے راز ثبات جاوداں

آج اگر شیرازۂ ہستی پریشاں ہے تو کیا

کل یہ دنیا وادیٔ رقص و نوا کہلائے گی

آج اگر جولاں گہ سیلاب و طوفاں ہے تو کیا

سڑ چکے اس کے عناصر ہٹ چکا سوز حیات

اب تجھے فکر علاج درد انساں ہے تو کیا

زندگی کی تلخیوں نے چھین لی تاب نظر

طور کی چوٹی پر افسرؔ اب چراغاں ہے تو کیا