khunTi par laTka hua badan

shaam hote hī maiñ

pasīne meñ bhīgā huā badan

khūñTī se laTkā detā huuñ

din bhar kī kamā.ī dekhne ke liye

jebeñ TaToltā huuñ to ḳhālī haath

jeboñ se bāhar gir paḌte haiñ

sochtā huuñ

pachās se uupar kā ho chukā huuñ

merā mustaqbil kyā hogā

aane vaalī nasl ko kyā muñh dikhā.ūñgā

pasīne meñ bhīgā huā badan

dhone se Dartā huuñ

ki aane vaale merī mehnat kī nishānī māñgeñge

to kyā dikhā.ūñgā

khūñTī par laTkā huā badan

saarī raat mujhe ghūrtā rahtā hai

ḳhālī haath

chārpā.ī ke nīche paḌe rahte haiñ

sub.h hone par

badan khūñTī se utārtā huuñ

haath chārpā.ī ke nīche se uThātā huuñ

darvāza kholtā huuñ

din apnī puurī saffākī ke saath

ek baar phir mere muqābil khaḌā hotā hai

sham hote hi main

pasine mein bhiga hua badan

khunTi se laTka deta hun

din bhar ki kamai dekhne ke liye

jeben TaTolta hun to KHali hath

jebon se bahar gir paDte hain

sochta hun

pachas se upar ka ho chuka hun

mera mustaqbil kya hoga

aane wali nasl ko kya munh dikhaunga

pasine mein bhiga hua badan

dhone se Darta hun

ki aane wale meri mehnat ki nishani mangenge

to kya dikhaunga

khunTi par laTka hua badan

sari raat mujhe ghurta rahta hai

KHali hath

chaarpai ke niche paDe rahte hain

subh hone par

badan khunTi se utarta hun

hath chaarpai ke niche se uThata hun

darwaza kholta hun

din apni puri saffaki ke sath

ek bar phir mere muqabil khaDa hota hai