KHwab dekhta hun

maiñ ik hasīñ ḳhvāb dekhtā huuñ

maiñ dekhtā huuñ

vo kisht-e-vīrāñ

ki sālhā-sāl se

jo abr ko bhī taras rahī thī

vo kisht-e-vīrāñ

ki jis ke lab ḳhushk ho chuke the

jo abr-e-naisāñ kī muntazar thī

jo kitnī sadiyoñ se

bād-o-bārāñ kī muntazir thī

maiñ dekhtā huuñ

us apnī maġhmūm kisht-e-vīrāñ pe

kuchh ghaTā nahīñ

jo aaj lahrā ke chhā ga.ī haiñ

ye sard havā ke jhoñke

na ruk sake jo kisī ke roke

zarā tamāzat jo kam huī hai

hayāt kuchh mohtaram huī hai

maiñ ik hasīñ ḳhvāb dekhtā huuñ

maiñ dekhtā huuñ

ki jaise shab kī siyāh chādar

simaT rahī hai

vo tīrgī

ham jise muqaddar samajh chuke the

vo chhaT rahī hai

maiñ dekhtā huuñ

ki sub.h-e-fardā

hazār ra.anā.iyāñ jilau meñ

liye muskurā rahī hai

maiñ dekhtā huuñ

jabīñ ufuq kī jo nūr-e-fardā se hai munavvar

sahar kā paiġhām de rahī hai

jo raushnī kā

jo zindagī kā

har ik ko in.aam de rahī hai

main ek hasin KHwab dekhta hun

main dekhta hun

wo kisht-e-viran

ki salha-sal se

jo abr ko bhi taras rahi thi

wo kisht-e-viran

ki jis ke lab KHushk ho chuke the

jo abr-e-naisan ki muntazar thi

jo kitni sadiyon se

baad-o-baran ki muntazir thi

main dekhta hun

us apni maghmum kisht-e-viran pe

kuchh ghaTa nahin

jo aaj lahra ke chha gai hain

ye sard hawa ke jhonke

na ruk sake jo kisi ke roke

zara tamazat jo kam hui hai

hayat kuchh mohtaram hui hai

main ek hasin KHwab dekhta hun

main dekhta hun

ki jaise shab ki siyah chadar

simaT rahi hai

wo tirgi

hum jise muqaddar samajh chuke the

wo chhaT rahi hai

main dekhta hun

ki subh-e-farda

hazar ranaiyan jilau mein

liye muskura rahi hai

main dekhta hun

jabin ufuq ki jo nur-e-farda se hai munawwar

sahar ka paigham de rahi hai

jo raushni ka

jo zindagi ka

har ek ko inam de rahi hai