خواب جمہور

خیال آتا ہے جمہوریت کے خوابوں کا

سنہری خواب

جو نیندوں کو تازگی بخشیں

یقیں کے نور سے تعبیر جن کی مل جائے

کہ آدھی رات کو کوئی نہ اٹھ کے گھبرائے

کھلی سڑک پہ یہ آدم گزیدہ لوگ نہ ہوں

کسی بھی سمت سے ابھرے نہ تیرگی کوئی

حیات و موت میں پیہم نہ کشمکش ہو کوئی

خیال آتا ہے

بچھائیں دور تلک زیست کے اجالوں کو

ہنسی کے پھول کھلائیں

کہ زندگی کی نزاکت ہو تتلیوں میں جہاں

جنہیں پکڑنے یہ بچے بھی دوڑتے ہوں گے

چمن چمن میں بہاروں میں گلعدزاروں میں

بچھائے کوئی نہ بارود سبزہ زاروں میں

کہ ساری تتلیاں ہجرت ہی کر نہ جائیں کہیں

بجائے ان کے

یہ دہشت نہ پھیلنے پائے

ہنسی جھلسنے نہ پائے نہ روشنی جائے

خیال آتا ہے

مٹھاس دودھ کی ہونٹوں کے نرم گوشوں میں

خوشی کھلائے خدائی بھی ماں کے آنچل میں

ہنسی کلی میں ہو تو گفتگو ہو پھولوں میں

بھٹک نہ جائیں یہ سانسیں بقا کی راہوں میں

یہاں نہ موت کا سایا ہو سائبانوں میں

ہر ایک گھر میں سکوں ہو سکون پیہم ہو

مکین خوش ہوں مکانوں میں پھول آنگن میں

کہ زیست پانے میں دل کو خوشی میسر ہو

خیال آتا ہے

پناہ سب کو ملے گی حصار شہر میں اب

گلی گلی میں محبت کی بولیاں ہوں گی

ہر ایک موڑ پہ چاہت کے مورچے ہوں گے

مٹھاس شہد کی ہوگی ہر ایک صحبت میں

خیال آتا ہے

یہ شہر میرا کبھی شہر دوستاں ہوتا

یقیں کے نام سے اٹھتے

سحر جو ہوتی سحر

ہر ایک سانس میں

نغموں کا ہی گماں ہوتا

غروب ہوتے ہی دن کی بھی اک دعا ہوگی

خدا کرے کہ مرے شہر کے خداؤں کو

سلامتی کا کوئی اسم یاد آ جائے