KHwab-e-jamhur

ḳhayāl aatā hai jamhūriyat ke ḳhvāboñ kā

sunahrī ḳhvāb

jo nīñdoñ ko tāzgī baḳhsheñ

yaqīñ ke nuur se ta.abīr jin kī mil jaa.e

ki aadhī raat ko koī na uTh ke ghabrā.e

khulī saḌak pe ye ādam-gazīda log na hoñ

kisī bhī samt se ubhre na tīrgī koī

hayāt-o-maut meñ paiham na kashmakash ho koī

ḳhayāl aatā hai

bichhā.eñ duur talak ziist ke ujāloñ ko

hañsī ke phuul khilā.eñ

ki zindagī kī nazākat ho titliyoñ meñ jahāñ

jinheñ pakaḌne ye bachche bhī dauḌte hoñge

chaman chaman meñ bahāroñ meñ gul-'izāroñ meñ

bichhā.e koī na bārūd sabza-zāroñ meñ

ki saarī titliyāñ hijrat hī kar na jaa.eñ kahīñ

bajā.e un ke

ye dahshat na phailne paa.e

hañsī jhulasne na paa.e na raushnī jaa.e

ḳhayāl aatā hai

miThās duudh kī hoñToñ ke narm goshoñ meñ

ḳhushī khilā.e ḳhudā.ī bhī maañ ke āñchal meñ

hañsī kalī meñ ho to guftugū ho phūloñ meñ

bhaTak na jaa.eñ ye sāñseñ baqā kī rāhoñ meñ

yahāñ na maut kā saayā ho sā.ebānoñ meñ

har ek ghar meñ sukūñ ho sukūn-e-paiham ho

makīn ḳhush hoñ makānoñ meñ phuul āñgan meñ

ki ziist paane meñ dil ko ḳhushī mayassar ho

ḳhayāl aatā hai

panāh sab ko milegī hisār-e-shahr meñ ab

galī galī meñ mohabbat kī boliyāñ hoñgī

har ek moḌ pe chāhat ke morche hoñge

miThās shahd kī hogī har ek sohbat meñ

ḳhayāl aatā hai

ye shahr merā kabhī shahr-e-dostāñ hotā

yaqīñ ke naam se uThte

sahar jo hotī sahar

har ek saañs meñ

naġhmoñ kā hī gumāñ hotā

ġhurūb hote hī din kī bhī ik duā hogī

ḳhudā kare ki mire shahr ke ḳhudāoñ ko

salāmatī kā koī ism yaad aa jaa.e

KHayal aata hai jamhuriyat ke KHwabon ka

sunahri KHwab

jo nindon ko tazgi baKHshen

yaqin ke nur se tabir jin ki mil jae

ki aadhi raat ko koi na uTh ke ghabrae

khuli saDak pe ye aadam-gazida log na hon

kisi bhi samt se ubhre na tirgi koi

hayat-o-maut mein paiham na kashmakash ho koi

KHayal aata hai

bichhaen dur talak zist ke ujalon ko

hansi ke phul khilaen

ki zindagi ki nazakat ho titliyon mein jahan

jinhen pakaDne ye bachche bhi dauDte honge

chaman chaman mein bahaaron mein gul-'izaron mein

bichhae koi na barud sabza-zaron mein

ki sari titliyan hijrat hi kar na jaen kahin

bajae un ke

ye dahshat na phailne pae

hansi jhulasne na pae na raushni jae

KHayal aata hai

miThas dudh ki honTon ke narm goshon mein

KHushi khilae KHudai bhi man ke aanchal mein

hansi kali mein ho to guftugu ho phulon mein

bhaTak na jaen ye sansen baqa ki rahon mein

yahan na maut ka saya ho saebanon mein

har ek ghar mein sukun ho sukun-e-paiham ho

makin KHush hon makanon mein phul aangan mein

ki zist pane mein dil ko KHushi mayassar ho

KHayal aata hai

panah sab ko milegi hisar-e-shahr mein ab

gali gali mein mohabbat ki boliyan hongi

har ek moD pe chahat ke morche honge

miThas shahd ki hogi har ek sohbat mein

KHayal aata hai

ye shahr mera kabhi shahr-e-dostan hota

yaqin ke nam se uThte

sahar jo hoti sahar

har ek sans mein

naghmon ka hi guman hota

ghurub hote hi din ki bhi ek dua hogi

KHuda kare ki mere shahr ke KHudaon ko

salamati ka koi ism yaad aa jae