KHwab-e-sarab

ab jo socheñ bhī to ḳhauf aatā hai

kis qadar ḳhvāb the jo ḳhvāb rahe

kis qadar naqsh the jo naqsh sar-e-āb rahe

kis qadar log the jo

dil kī dahlīz pe dastak kī tarah rahte the aur nāyāb rahe

kis qadar rañg the jo

band galiyoñ ke ḳham-o-pech meñ chakrāte rahe

apne hone kī tab-o-tāb meñ lahrāte rahe

par kabhī aap se bāhar na hue

phuul ke haath meñ zāhir na hue

dil ke girdāb meñ TuuTe hue pattoñ kī tarah hama-tan raqs rahe

ḳhuuñ be-nām sitāroñ kī tarah aks dar aks rahe

kaise ādarsh the jin ke saa.e

sansanāte hue tīroñ kī tarah chalte the

hast aur niist ke mābain ajab rishta thā

ruuh kī aag bhaḌaktī to badan jalte the

vo shab-o-roz the kyā

jab kisī ḳhvāhish bedār kī tuġhyānī meñ

vaqt kī qaid se lamhāt nikal jaate the

ḳhuuñ meñ jab bhī sulagtā thā irāda koī

āhanī tauq tamāzat se pighal jaate the

2

aañkh ke dasht meñ ab laakh alaav dekheñ

ruuh kī barf pighaltī hī nahīñ

ab vo ādarsh kabhī

vaqt kī ret se jhāñkeñ bhī to yuuñ jhāñkte haiñ

jis tarah TūTtā taarā koī

ek lamhe ke liye kauñd ke chhup jaatā hai

kis qadar ḳhvāb the jo ḳhvāb rahe

ab jo socheñ bhī to ḳhauf aatā hai

ab jo sochen bhi to KHauf aata hai

kis qadar KHwab the jo KHwab rahe

kis qadar naqsh the jo naqsh sar-e-ab rahe

kis qadar log the jo

dil ki dahliz pe dastak ki tarah rahte the aur nayab rahe

kis qadar rang the jo

band galiyon ke KHam-o-pech mein chakraate rahe

apne hone ki tab-o-tab mein lahraate rahe

par kabhi aap se bahar na hue

phul ke hath mein zahir na hue

dil ke girdab mein TuTe hue patton ki tarah hama-tan raqs rahe

KHun be-nam sitaron ki tarah aks dar aks rahe

kaise aadarsh the jin ke sae

sansanate hue tiron ki tarah chalte the

hast aur nist ke mabain ajab rishta tha

ruh ki aag bhaDakti to badan jalte the

wo shab-o-roz the kya

jab kisi KHwahish bedar ki tughyani mein

waqt ki qaid se lamhat nikal jate the

KHun mein jab bhi sulagta tha irada koi

aahani tauq tamazat se pighal jate the

2

aankh ke dasht mein ab lakh alaw dekhen

ruh ki barf pighalti hi nahin

ab wo aadarsh kabhi

waqt ki ret se jhanken bhi to yun jhankte hain

jis tarah TuTta tara koi

ek lamhe ke liye kaund ke chhup jata hai

kis qadar KHwab the jo KHwab rahe

ab jo sochen bhi to KHauf aata hai