KHwab jalte hue

mohabbat kā naġhma sunāo to jānūñ

qarīb aa ke phir muskurāo to jānūñ

ye maanā ki tum ġhair kī ho chukī ho

mujhe yaad bhī ab na aao to jānūñ

tumheñ dahr kī saarī ḳhushiyāñ mubārak

mujhe āñdhiyāñ ġham kī raas aa ga.ī haiñ

azal se jo haiñ āshiqoñ kā muqaddar

vo māyūsiyāñ mere paas aa ga.ī haiñ

maiñ sāhil se ukhḌā to ab jaan paayā

ki sāhil ko kyoñ DhūñDhtā hai zamāna

jo himmat se tūfāñ kā muñh moḌte haiñ

hai un kā muqaddar bhī kyoñ Duub jaanā

mirī ziist hai barf kā ek tuuda

samundar meñ jo vaqt ke bah rahā hai

mirī bebasī kā ġham-āgīñ fasāna

zabān-e-ḳhamoshī se vo kah rahā hai

sharāb-e-masarrat se labrez thiiñ jo

in āñkhoñ meñ vīrāniyāñ chhā rahī haiñ

kiyā tū ne jis din se qat-e-ta.alluq

mire sar pe āfāt mañDlā rahī haiñ

haqā.eq ke ḳhuñḳhār sho.aloñ meñ ab to

shuā.eñ sahar kī Dhalī jā rahī haiñ

mire ḳhūb-sūrat se ḳhvāboñ kī fasleñ

tamāzat se un kī jalī jā rahī haiñ

mohabbat ka naghma sunao to jaanun

qarib aa ke phir muskurao to jaanun

ye mana ki tum ghair ki ho chuki ho

mujhe yaad bhi ab na aao to jaanun

tumhein dahr ki sari KHushiyan mubarak

mujhe aandhiyan gham ki ras aa gai hain

azal se jo hain aashiqon ka muqaddar

wo mayusiyan mere pas aa gai hain

main sahil se ukhDa to ab jaan paya

ki sahil ko kyon DhunDhta hai zamana

jo himmat se tufan ka munh moDte hain

hai un ka muqaddar bhi kyon Dub jaana

meri zist hai barf ka ek tuda

samundar mein jo waqt ke bah raha hai

meri bebasi ka gham-agin fasana

zaban-e-KHamoshi se wo kah raha hai

sharab-e-masarrat se labrez thin jo

in aankhon mein viraniyan chha rahi hain

kiya tu ne jis din se qat-e-talluq

mere sar pe aafat manDla rahi hain

haqaeq ke KHunKHar shoalon mein ab to

shuaen sahar ki Dhali ja rahi hain

mere KHub-surat se KHwabon ki faslen

tamazat se un ki jali ja rahi hain