خواب جلتے ہوئے

محبت کا نغمہ سناؤ تو جانوں

قریب آ کے پھر مسکراؤ تو جانوں

یہ مانا کہ تم غیر کی ہو چکی ہو

مجھے یاد بھی اب نہ آؤ تو جانوں

تمہیں دہر کی ساری خوشیاں مبارک

مجھے آندھیاں غم کی راس آ گئی ہیں

ازل سے جو ہیں عاشقوں کا مقدر

وہ مایوسیاں میرے پاس آ گئی ہیں

میں ساحل سے اکھڑا تو اب جان پایا

کہ ساحل کو کیوں ڈھونڈھتا ہے زمانہ

جو ہمت سے طوفاں کا منہ موڑتے ہیں

ہے ان کا مقدر بھی کیوں ڈوب جانا

مری زیست ہے برف کا ایک تودہ

سمندر میں جو وقت کے بہہ رہا ہے

مری بے بسی کا غم آگیں فسانہ

زبان خموشی سے وہ کہہ رہا ہے

شراب مسرت سے لبریز تھیں جو

ان آنکھوں میں ویرانیاں چھا رہی ہیں

کیا تو نے جس دن سے قطع تعلق

مرے سر پہ آفات منڈلا رہی ہیں

حقائق کے خونخوار شعلوں میں اب تو

شعاعیں سحر کی ڈھلی جا رہی ہیں

مرے خوبصورت سے خوابوں کی فصلیں

تمازت سے ان کی جلی جا رہی ہیں