KHwab ki tarah se yaad hai

ḳhvāb kī tarah se hai yaad ki tum aa.e the

jis tarah dāman-e-mashriq meñ sahar hotī hai

zarre zarre ko tajallī kī ḳhabar hotī hai

aur jab nuur kā sailāb guzar jaatā hai

raat bhar ek añdhere meñ basar hotī hai

kuchh isī tarah se hai yaad ki tum aa.e the

jaise gulshan meñ dabe paañv bahār aatī hai

pattī pattī ke liye le ke nikhār aatī hai

aur phir vaqt vo aatā hai ki har mauj-e-sabā

apne dāman meñ liye gard-o-ġhubār aatī hai

kuchh isī tarah se hai yaad ki tum aa.e the

jis tarah mahv-e-safar ho koī vīrāne meñ

aur raste meñ kahīñ koī ḳhayābāñ aa jaa.e

chand lamhoñ meñ ḳhayābāñ ke guzar jaane par

sāmne phir vahī duniyā-e-bayābāñ aa jaa.e

kuchh isī tarah se hai yaad ki tum aa.e the

KHwab ki tarah se hai yaad ki tum aae the

jis tarah daman-e-mashriq mein sahar hoti hai

zarre zarre ko tajalli ki KHabar hoti hai

aur jab nur ka sailab guzar jata hai

raat bhar ek andhere mein basar hoti hai

kuchh isi tarah se hai yaad ki tum aae the

jaise gulshan mein dabe panw bahaar aati hai

patti patti ke liye le ke nikhaar aati hai

aur phir waqt wo aata hai ki har mauj-e-saba

apne daman mein liye gard-o-ghubar aati hai

kuchh isi tarah se hai yaad ki tum aae the

jis tarah mahw-e-safar ho koi virane mein

aur raste mein kahin koi KHayaban aa jae

chand lamhon mein KHayaban ke guzar jaane par

samne phir wahi duniya-e-bayaban aa jae

kuchh isi tarah se hai yaad ki tum aae the