KHwabida

ham to ḳhvāboñ kī duniyā se aa.e hue log haiñ

ham ko rasm-o-rivājoñ ke is pech-o-ḳham meñ ulajhne kī ḳhātir banāyā gayā hī nahīñ

ham ne lafzoñ ko mā'nī se sarshār rakhne kā zimma uThāyā huā hai

isī ek koshish meñ lipTe hue in kitāboñ ke varqoñ pe ashkoñ ke vo zā.iqe

jin se dardoñ kī be-kal ravānī chhalaktī huī dikh rahī ho batāo bhalā

tum batāo

ki vo kis jahān-e-ḳharābāt se raushnī kī qatāroñ ko qarzoñ kī sūrat meñ le kar

baḌe maan se aise manzar

banātī huī aañkh hai

aañkh vo ḳhvāb-nagrī se aa.ī huī

haath vo jin pe apne hī hāthoñ ke nas kaaT dene kā bhārī sā ik bojh ho

aur qadam

vo qadam jo ki jab bhī uThe to jafāoñ ko ik maqnātīsī kashish ke natīje meñ khīñche

to phir

dauḌte aa.eñ saare 'azāboñ sarāboñ añdheroñ ke saare qabīle

usī maqnātīsī kashish kī taraf

jis ko ḳhvāboñ meñ dekhā gayā ho

haqīqat se us kā koī vāsta hī nahīñ ho

aur vo bāñheñ

vo ḳhamdār bāñheñ

vahī

jin se milne kī ḳhātir baḌī iztirābī ke 'ālam meñ

raftār yūñhī baḌhāte hue

us ghaḌī ke shikanje se āzād hone kī ḳhvāhish meñ kitne minute

jaane kitne minute har minute be-sabab yūñhī girte rahe

vaqt ke aa.ine gard-ālūd hote hue dikh rahe haiñ jinheñ

vo sabhī ḳhuun ke saare dhabboñ kī pādāsh meñ sab jhameloñ ko apne hī kāñdhoñ pe rakh kar chale

aur chalte hue ek pal ke liye bhī zarā saañs lene kī ḳhātir ruke tak nahīñ

jo thake tak nahīñ

ham vahī log haiñ

ham to ḳhvāboñ kī duniyā se aa.e hue log haiñ

ham ko rasm-o-rivājoñ ke is pech-o-ḳham meñ ulajhne kī ḳhātir banāyā gayā hī nahīñ

ham ne lafzoñ ko mā'nī se sarshār rakhne kā zimma uThāyā huā hai

hum to KHwabon ki duniya se aae hue log hain

hum ko rasm-o-riwajon ke is pech-o-KHam mein ulajhne ki KHatir banaya gaya hi nahin

hum ne lafzon ko ma'ni se sarshaar rakhne ka zimma uThaya hua hai

isi ek koshish mein lipTe hue in kitabon ke warqon pe ashkon ke wo zaiqe

jin se dardon ki be-kal rawani chhalakti hui dikh rahi ho batao bhala

tum batao

ki wo kis jahan-e-KHarabaat se raushni ki qataron ko qarzon ki surat mein le kar

baDe man se aise manzar

banati hui aankh hai

aankh wo KHwab-nagri se aai hui

hath wo jin pe apne hi hathon ke nas kaT dene ka bhaari sa ek bojh ho

aur qadam

wo qadam jo ki jab bhi uThe to jafaon ko ek maqnatisi kashish ke natije mein khinche

to phir

dauDte aaen sare 'azabon sarabon andheron ke sare qabile

usi maqnatisi kashish ki taraf

jis ko KHwabon mein dekha gaya ho

haqiqat se us ka koi wasta hi nahin ho

aur wo banhen

wo KHamdar banhen

wahi

jin se milne ki KHatir baDi iztirabi ke 'alam mein

raftar yunhi baDhate hue

us ghaDi ke shikanje se aazad hone ki KHwahish mein kitne minute

jaane kitne minute har minute be-sabab yunhi girte rahe

waqt ke aaine gard-alud hote hue dikh rahe hain jinhen

wo sabhi KHun ke sare dhabbon ki padash mein sab jhamelon ko apne hi kandhon pe rakh kar chale

aur chalte hue ek pal ke liye bhi zara sans lene ki KHatir ruke tak nahin

jo thake tak nahin

hum wahi log hain

hum to KHwabon ki duniya se aae hue log hain

hum ko rasm-o-riwajon ke is pech-o-KHam mein ulajhne ki KHatir banaya gaya hi nahin

hum ne lafzon ko ma'ni se sarshaar rakhne ka zimma uThaya hua hai