KHwabon ka murda ghar

tanhā.ī ko ḳhvāb kī dastak dete dekhā

dekhā ik gumbad ke nīche

khaḌā huā huuñ

suntā huuñ ḳhud kī āvāzeñ

ye āvāzeñ

mujh ko vāpas le jaatī haiñ

ḳhvāboñ ke us murda-ghar meñ

jo bilkul tārīk paḌā hai

jis meñ mere maazī ke kirdāroñ ke

kuchh kafan paḌe haiñ

un logoñ ke

jo zīnat the in ḳhvāboñ kī

lekin un kirdāroñ kī ab shakl nahīñ hai

ik tārīkī hai badbū hai ḳhāmoshī hai

murda-ghar ke pardoñ se

merī āvāzeñ jhuul rahī haiñ

jin se ik chamgādaḌ kā nanhā sā bachcha

khel rahā hai

saḌkoñ par kohrām machā hai

kuchh to huā hai

log mare haiñ

lahū bahā hai

aur ye chamgādaḌ kā bachcha

merī tanhā.ī kā vāris

merī āvāzoñ kī larzāñ uñglī thāme

mujh ko us manzar kī jānib khīñch rahā hai

jahāñ kisī nanhe bachche kī

laash paḌī hai

aur vo chamgādaḌ kā bachcha

mere zehn kī sūkhī partoñ meñ

ehsās kā resha DhūñD rahā hai

aur is ThanDī laash pe baiThā

sisak rahā hai

tanhai ko KHwab ki dastak dete dekha

dekha ek gumbad ke niche

khaDa hua hun

sunta hun KHud ki aawazen

ye aawazen

mujh ko wapas le jati hain

KHwabon ke us murda-ghar mein

jo bilkul tarik paDa hai

jis mein mere mazi ke kirdaron ke

kuchh kafan paDe hain

un logon ke

jo zinat the in KHwabon ki

lekin un kirdaron ki ab shakl nahin hai

ek tariki hai badbu hai KHamoshi hai

murda-ghar ke pardon se

meri aawazen jhul rahi hain

jin se ek chamgadaD ka nanha sa bachcha

khel raha hai

saDkon par kohram macha hai

kuchh to hua hai

log mare hain

lahu baha hai

aur ye chamgadaD ka bachcha

meri tanhai ka waris

meri aawazon ki larzan ungli thame

mujh ko us manzar ki jaanib khinch raha hai

jahan kisi nanhe bachche ki

lash paDi hai

aur wo chamgadaD ka bachcha

mere zehn ki sukhi parton mein

ehsas ka resha DhunD raha hai

aur is ThanDi lash pe baiTha

sisak raha hai