خوابوں کی بدلی تھی وہ ایک

خوابوں کی بدلی تھی وہ ایک

گھمڑ گھمڑ کے آدھی رات کو چھائی تھی وہ

کیا کیا نہ اسباب سمیٹے

کتنے لمحے کتنی یادیں

سیلی گیلی

تاریخیں تو کلنڈر کو

چھوڑ کے کب کی جا ہی چکی تھیں

جو بھی بچا تھا

وقت سمیٹ کے اوپر رکھا

گھر کی ایک ایک چیز پہ جو وہ

لمس چھپا تھا بہ نہ جائے

اس کی خاطر

جسم پہ اس کو دھار لیا تھا

کچھ بھی تو بچنا مشکل تھا

پلکوں تک پانی آتا تھا

کیسا تو سیلاب بپا تھا

کوشش اتنی کرنے پر بھی

صبح ہوئی تو کچھ بھی میرے پاس نہیں تھا

آنسو تک بھی میرا دامن چھوڑ چکے تھے

خوابوں کی کیسی بدلی تھی