KHwabon ki rakh

maiñ ne sochā thā kabhī maiñ ne ye chāhā thā kabhī

zindagī apnī mohabbat kī girāñ-bār na ho

tere jalve mirī āñkhoñ se kabhī duur na huuñ

fāsla apne liye raah kī dīvār na ho

maiñ ne sochā thā kabhī maiñ ne ye samjhā thā kabhī

merī jaañ mastī-e-fikr-o-nazar hai tujh se

zulf-o-ruḳhsār kī uḌtī huī ḳhushbū kī qasam

raunaq-e-silsila-e-shām-o-sahar hai tujh se

maiñ ne sochā thā kabhī maiñ ne ye chāhā thā kabhī

merī bikhrī huī āvāz kā jaadū tū hai

merī taḳh.īl pe lahrā.ī huī qaus-e-quzah

mere ehsās pe chhā.ī huī ḳhushbū tū hai

merī firdaus-e-tasavvur tirī ulfat kī qasam

markaz-e-nazm-o-ġhazal tujh ko banāyā maiñ ne

merī taḳh.īl meñ ai gulshan-e-nairañg-e-nigāh

apne naġhmoñ se shabistān sajāyā maiñ ne

maiñ ne samjhā kabhī 'azrā' kabhī 'sītā' tujh ko

kabhī 'shīrīñ' nazar aa.ī hai mujhe māh-jabīñ

kabhī ik paikar-e-ma.asūm 'zuleḳhā' ban kar

merī afsurda sī duniyā ko kiyā tū ne hasīñ

phir faroġh-e-lab-o-ruḳhsār se ai sho.ala-badan

dil meñ armān kī sham.oñ ko jalāyā maiñ ne

dasht-e-vahshat meñ liye qāfila-e-shauq tamām

apnī manzil kā pata azm se paayā maiñ ne

zulmat-e-yās meñ muztar-e-dil-o-dīda ke liye

shām-e-gesū liye aatī hai rahī paiġhām-e-sahar

bārhā terī nigāhoñ kā fusūñ jaag uThā

jhilmilāte hue tāroñ meñ mirī rashk-e-qamar

kyā batā.ūñ tirī ulfat meñ mirī jān-e-vafā

maiñ ne hañs hañs ke uThā.e haiñ zamāne ke sitam

aaj lekin mujhe hālāt ne majbūr kiyā

maiñ bhaTaktā huuñ pareshān liye bār-e-alam

aaj ma.alūm huā ātish-e-hijrāñ kyā hai

merī palkoñ pe mire ashkoñ bhī jal jaate haiñ

ham-safar milte haiñ daurān-e-safar kuchh aise

jo sar-e-manzil-e-maqsūd badal jaate haiñ

ḳhvāb-o-armān kī hai raakh mire dāman meñ

sochtā huuñ tirī chāhat ne diyā kyā mujh ko

jāntā huuñ ki miTā.eñge sar-e-hastī se

ek din ashk-o-alam jān-e-tamannā mujh ko

aaj ye raaz khulā aaj ye ma.alūm huā

terā dil mere liye to kabhī betāb na thā

kitnī be-rañg huī terī mohabbat kī kitāb

us fasāne meñ haqīqat kā koī baab na thā

merā sochā mirā samjhā mirā chāhā na huā

merī āñkhoñ kā koī ḳhvāb tirā ḳhvāb na thā

main ne socha tha kabhi main ne ye chaha tha kabhi

zindagi apni mohabbat ki giran-bar na ho

tere jalwe meri aankhon se kabhi dur na hun

fasla apne liye rah ki diwar na ho

main ne socha tha kabhi main ne ye samjha tha kabhi

meri jaan masti-e-fikr-o-nazar hai tujh se

zulf-o-ruKHsar ki uDti hui KHushbu ki qasam

raunaq-e-silsila-e-sham-o-sahar hai tujh se

main ne socha tha kabhi main ne ye chaha tha kabhi

meri bikhri hui aawaz ka jadu tu hai

meri taKHil pe lahrai hui qaus-e-quzah

mere ehsas pe chhai hui KHushbu tu hai

meri firdaus-e-tasawwur teri ulfat ki qasam

markaz-e-nazm-o-ghazal tujh ko banaya main ne

meri taKHil mein ai gulshan-e-nairang-e-nigah

apne naghmon se shabistan sajaya main ne

main ne samjha kabhi 'azra' kabhi 'sita' tujh ko

kabhi 'shirin' nazar aai hai mujhe mah-jabin

kabhi ek paikar-e-masum 'zuleKHa' ban kar

meri afsurda si duniya ko kiya tu ne hasin

phir farogh-e-lab-o-ruKHsar se ai shoala-badan

dil mein arman ki shamon ko jalaya main ne

dasht-e-wahshat mein liye qafila-e-shauq tamam

apni manzil ka pata azm se paya main ne

zulmat-e-yas mein muztar-e-dil-o-dida ke liye

sham-e-gesu liye aati hai rahi paigham-e-sahar

barha teri nigahon ka fusun jag uTha

jhilmilate hue taron mein meri rashk-e-qamar

kya bataun teri ulfat mein meri jaan-e-wafa

main ne hans hans ke uThae hain zamane ke sitam

aaj lekin mujhe haalat ne majbur kiya

main bhaTakta hun pareshan liye bar-e-alam

aaj malum hua aatish-e-hijran kya hai

meri palkon pe mere ashkon bhi jal jate hain

ham-safar milte hain dauran-e-safar kuchh aise

jo sar-e-manzil-e-maqsud badal jate hain

KHwab-o-arman ki hai rakh mere daman mein

sochta hun teri chahat ne diya kya mujh ko

jaanta hun ki miTaenge sar-e-hasti se

ek din ashk-o-alam jaan-e-tamanna mujh ko

aaj ye raaz khula aaj ye malum hua

tera dil mere liye to kabhi betab na tha

kitni be-rang hui teri mohabbat ki kitab

us fasane mein haqiqat ka koi bab na tha

mera socha mera samjha mera chaha na hua

meri aankhon ka koi KHwab tera KHwab na tha