KHwahish

koī shaam kī aahaT se pahle

koī shaam kī aahaT se pahle

Dhaltī huī sah-pahar meñ

phone kar ke bulā.e mujhe

kahīñ kisī

sarsabz lawn meñ biThā kar

achchhī sī chaa.e pilā.e mujhe

aur

chaa.e ke saath

ik mahfil jame

kuchh naġhme barseñ

kuchh sher uḌeñ

kuchh khaTTī mīThī sī

dhīmī dhīmī sī

bāteñ baneñ

aur bātoñ bātoñ meñ

thaam kar haath merā

vo dhīme se ik sargoshī kare

mujh se mohabbat kā dam bhare

maiñ uljhā uljhā soche jā.ūñ

us pal ko sadiyāñ sauñpe jā.ūñ

phir soch kar kuchh kahūñ us se

jo kahā hai

phir se dohrāoge

sach kaho mere ho jāoge

vo dabā kar nichlā lab apnā

bhar ke āñkhoñ meñ

sab kuchh apnā

dhīme se sar hilā.e

haule se merā haath dabā.e

aur

muskurā kar kahe

haañ mujhe tum se mohabbat hai

aur is iqrār ke baad achānak se

kaale bādal ghir kar chhā.eñ

ThanDī sī purvā.ī chale

aur

āsmān is iqrār ke sadqe

ham pe

bhīge bhīge phuul barsā.e

aur us tez bārish meñ

ham donoñ

duur kisī baaġh ke goshe meñ

bhīge bhīge lipTe khaḌe hoñ

koī to aisā bhī shaḳhs aa.e

shaam kī aahaT se pahle

Dhaltī huī sah-pahar meñ

phone kar ke bulā.e mujhe

koi sham ki aahaT se pahle

koi sham ki aahaT se pahle

Dhalti hui sah-pahar mein

phone kar ke bulae mujhe

kahin kisi

sarsabz lawn mein biTha kar

achchhi si chae pilae mujhe

aur

chae ke sath

ek mahfil jame

kuchh naghme barsen

kuchh sher uDen

kuchh khaTTi miThi si

dhimi dhimi si

baaten banen

aur baaton baaton mein

tham kar hath mera

wo dhime se ek sargoshi kare

mujh se mohabbat ka dam bhare

main uljha uljha soche jaun

us pal ko sadiyan saunpe jaun

phir soch kar kuchh kahun us se

jo kaha hai

phir se dohraoge

sach kaho mere ho jaoge

wo daba kar nichla lab apna

bhar ke aankhon mein

sab kuchh apna

dhime se sar hilae

haule se mera hath dabae

aur

muskura kar kahe

han mujhe tum se mohabbat hai

aur is iqrar ke baad achanak se

kale baadal ghir kar chhaen

ThanDi si purwai chale

aur

aasman is iqrar ke sadqe

hum pe

bhige bhige phul barsae

aur us tez barish mein

hum donon

dur kisi bagh ke goshe mein

bhige bhige lipTe khaDe hon

koi to aisa bhi shaKHs aae

sham ki aahaT se pahle

Dhalti hui sah-pahar mein

phone kar ke bulae mujhe