KHwaja-sara

chhail chhabīlā

Thumak Thumak kar beach saḌak meñ

aatī jaatī har gaaḌī se

bhiik kī pūñjī uchak rahā hai

fiqre kaste collage ke nau-ḳhez javānoñ se hans hans kar

bāteñ kartā maTak rahā hai

chaurāhe kā ishāra be-sharmī se ghuur rahā hai

laal prānda lapak lapak kar

naqlī kūlhoñ ko mas kartā laTak rahā hai

ja.alī Dhalvānoñ se vo rañgīn dupaTTa

ek taraf ko Dhalak rahā hai

kaalī gaaḌī vaalā kitnī be-zārī se

haath ko us ke jhaTak rahā hai

pairoñ meñ ghuñgrū chhankātā

mardāna chehre par mal kar jhuuT kā ġhāza

nisvānī rañgoñ meñ luthḌā ek hayūlā

jism aur jins ke ghanchakkar meñ bhaTak rahā hai

ab vo thoḌā dam lene ko

zard ishāre ke saa.e meñ aa baiThā hai

zard ishāra afsurda hai

aaj bhī us se pūchh rahā hai

luule lañgḌe andhe bahre

kitne hī ma.azūr yahāñ par roz aate haiñ

tum kaise ma.azūr ho jis kī jins nahīñ hai

taish meñ aa kar vo kahtā hai

nahīñ nahīñ ye jhuuT hai bilkul

maiñ ik aadhā mard huuñ lekin

apnī aadhī jins kahīñ par kho baiThā huuñ

zard ishāre ta.ana-zan hai

gar tum aadhe mard the to phir

āḳhir tum ne aurat hī kā ruup kyoñ dhārā

zahr-ālūd nigāhoñ se vo zard ishāre ko taktā hai

aur tīkhe andāz meñ yuuñ goyā hotā hai

jins-zada logoñ meñ ghir kar zinda rahnā

kab āsāñ hai

aurat hī kā ruup hai jis se

havas ke maare in logoñ ko dilchaspī hai

aurat hī kī majbūrī kā mol lagā kar

in logoñ ko haz miltā hai

tum kyā jaano peT kā ye dozaḳh bharne ko

kaise ḳhud ko bech ke ye kāġhaz miltā hai

zard ishāra ro paḌtā hai

rote rote phir kahtā hai

ye batlāo itnī zillat aur hiqārat āḳhir kaise sah lete ho

sach kahnā aise bhī insān to hoñge

jin se tum ne

insāñ hone ke naate hī

kuchh to izzat paa.ī hogī

kajrārī āñkhoñ se poñchh ke apne aañsū

ik talḳhī se vo kahtā hai

ham se asfal be-tauqīroñ ko izz-o-takrīm se kyā hai

shukr ḳhudā kā muft kī sāñseñ milī huī haiñ

ham ko to itnā bhī ġhanīmat hai ki ham ne

apnī apnī an-dekhī maaoñ kī muqaddas

kokh meñ puure nau mahīne izzat paa.ī

sabz ishāra jal uTThā hai

duur kisī gaaḌī se ik aḳhbār kā TukḌā

beach saḌak meñ aan girā hai

sarkārī bhartī kī ik tash.hīr hai jis meñ

mard aur aurat donoñ hī ko ahl likhā hai

rauñd ke apne pair ke nīche

ye tahqīr-āmez tarāshā

chhail chhabīlā

Thumak Thumak kar beach saḌak meñ

aatī jaatī har gaaḌī se

bhiik kī pūñjī uchak rahā hai

chhail chhabila

Thumak Thumak kar beach saDak mein

aati jati har gaDi se

bhik ki punji uchak raha hai

fiqre kaste collage ke nau-KHez jawanon se hans hans kar

baaten karta maTak raha hai

chaurahe ka ishaara be-sharmi se ghur raha hai

lal pranda lapak lapak kar

naqli kulhon ko mas karta laTak raha hai

jali Dhalwanon se wo rangin dupaTTa

ek taraf ko Dhalak raha hai

kali gaDi wala kitni be-zari se

hath ko us ke jhaTak raha hai

pairon mein ghungru chhankata

mardana chehre par mal kar jhuT ka ghaza

niswani rangon mein luthDa ek hayula

jism aur jins ke ghanchakkar mein bhaTak raha hai

ab wo thoDa dam lene ko

zard ishaare ke sae mein aa baiTha hai

zard ishaara afsurda hai

aaj bhi us se puchh raha hai

lule langDe andhe bahre

kitne hi mazur yahan par roz aate hain

tum kaise mazur ho jis ki jins nahin hai

taish mein aa kar wo kahta hai

nahin nahin ye jhuT hai bilkul

main ek aadha mard hun lekin

apni aadhi jins kahin par kho baiTha hun

zard ishaare tana-zan hai

gar tum aadhe mard the to phir

aaKHir tum ne aurat hi ka rup kyon dhaara

zahr-alud nigahon se wo zard ishaare ko takta hai

aur tikhe andaz mein yun goya hota hai

jins-zada logon mein ghir kar zinda rahna

kab aasan hai

aurat hi ka rup hai jis se

hawas ke mare in logon ko dilchaspi hai

aurat hi ki majburi ka mol laga kar

in logon ko haz milta hai

tum kya jaano peT ka ye dozaKH bharne ko

kaise KHud ko bech ke ye kaghaz milta hai

zard ishaara ro paDta hai

rote rote phir kahta hai

ye batlao itni zillat aur hiqarat aaKHir kaise sah lete ho

sach kahna aise bhi insan to honge

jin se tum ne

insan hone ke nate hi

kuchh to izzat pai hogi

kajrari aankhon se ponchh ke apne aansu

ek talKHi se wo kahta hai

hum se asfal be-tauqiron ko izz-o-takrim se kya hai

shukr KHuda ka muft ki sansen mili hui hain

hum ko to itna bhi ghanimat hai ki hum ne

apni apni an-dekhi maon ki muqaddas

kokh mein pure nau mahine izzat pai

sabz ishaara jal uTTha hai

dur kisi gaDi se ek aKHbar ka TukDa

beach saDak mein aan gira hai

sarkari bharti ki ek tashhir hai jis mein

mard aur aurat donon hi ko ahl likha hai

raund ke apne pair ke niche

ye tahqir-amez tarasha

chhail chhabila

Thumak Thumak kar beach saDak mein

aati jati har gaDi se

bhik ki punji uchak raha hai