ki dar guftan nami aayad

mirī jaañ go tujhe dil se bhulāyā jā nahīñ saktā

magar ye baat maiñ apnī zabāñ par lā nahīñ saktā

tujhe apnā banānā mojib-e-rāhat samajh kar bhī

tujhe apnā banā luuñ ye tasavvur lā nahīñ saktā

huā hai bār-hā ehsās mujh ko is haqīqat kā

tire nazdīk rah kar bhī maiñ tujh ko pā nahīñ saktā

mire dast-e-havas kī dastaras hai jism tak tere

samajhtā huuñ ki tere dil pe qabza pā nahīñ saktā

tire dil kī tamannā bhī karūñ to kis bharose par

maiñ ḳhud dargāh meñ terī ye tohfa lā nahīñ saktā

mirī majbūriyoñ ko bhī bahut kuchh daḳhl hai is meñ

tujhī ko morid-e-ilzām maiñ Thahrā nahīñ saktā

maiñ tujh se baḌh ke apnī aabrū ko pyaar kartā huuñ

maiñ apne izzat-o-nāmūs ko Thukrā nahīñ saktā

tire māhaul kī pastī kā ta.ana duuñ tujhe kyuuñ kar

maiñ ḳhud māhaul se apne rihā.ī pā nahīñ saktā

meri jaan go tujhe dil se bhulaya ja nahin sakta

magar ye baat main apni zaban par la nahin sakta

tujhe apna banana mojib-e-rahat samajh kar bhi

tujhe apna bana lun ye tasawwur la nahin sakta

hua hai bar-ha ehsas mujh ko is haqiqat ka

tere nazdik rah kar bhi main tujh ko pa nahin sakta

mere dast-e-hawas ki dastaras hai jism tak tere

samajhta hun ki tere dil pe qabza pa nahin sakta

tere dil ki tamanna bhi karun to kis bharose par

main KHud dargah mein teri ye tohfa la nahin sakta

meri majburiyon ko bhi bahut kuchh daKHl hai is mein

tujhi ko morid-e-ilzam main Thahra nahin sakta

main tujh se baDh ke apni aabru ko pyar karta hun

main apne izzat-o-namus ko Thukra nahin sakta

tere mahaul ki pasti ka tana dun tujhe kyun kar

main KHud mahaul se apne rihai pa nahin sakta