kis ke sheron mein kis ki baaten hain

merī likhne meñ umr guzrī hai

terī paḌhne kī umr hai laḌkī

terī sochoñ kī sab ḳhabar hai mujhe

mujh pe ye vaqt aa ke biit chukā

maiñ bhī ḳhud se savāl kartā thā

kis kī ġhazloñ meñ kis ke jalve haiñ

kis kā chehra hai kis kī nazmoñ meñ

kaun rotā hai kis ke lahje meñ

kis ke sheroñ meñ kis kī bāteñ haiñ

phir javābāt mil ga.e mujh ko

ab hañsī aatī hai savāloñ par

aur tujh par bhī aur ḳhud par bhī

tujhe ma.alūm kyā ki ik aamad

kitne jazboñ se hāmila ho kar

leT kar ek besvā kī tarah

kore kāġhaz ke sard bistar par

vo harāmī kalām jantī hai

jis pe fatve faqīh-e-shahr ke haiñ

jo ḳhudāoñ ko gaalī lagtā hai

jis pe raj.at-pasand kuḌhte haiñ

jis pe jiddat-parast hañste haiñ

jis kā ThaTThā uḌāte haiñ lauñDe

jis ke fan kā zamāna biit gayā

jis se nafrat hai ilm vāloñ ko

jis pe ḳhud mujh ko ġhussa aatā hai

jise tū bhī samajh nahīñ paatī

naam apnā khurach ke jis par se

maiñ ne raddī meñ bārhā bechā

aur cigarette ḳharīde apne liye

aur is dil ko aag meñ phūñkā

jis ke jazboñ se hāmila ho kar

kore kāġhaz ke sard bistar par

leT kar ek besvā kī tarah

merī qudrat kī shāhkār aamad

vo harāmī kalām jannatī hai

terī sochoñ kī sab ḳhabar hai mujhe

mere sheroñ meñ kaun hai mat soch

terī paḌhne kī umr hai laḌkī

aur phir sochne se kyā hāsil

bārvar justujū huī bhī to kyā

merī ġhazloñ meñ tū huī bhī to kyā

meri likhne mein umr guzri hai

teri paDhne ki umr hai laDki

teri sochon ki sab KHabar hai mujhe

mujh pe ye waqt aa ke bit chuka

main bhi KHud se sawal karta tha

kis ki ghazlon mein kis ke jalwe hain

kis ka chehra hai kis ki nazmon mein

kaun rota hai kis ke lahje mein

kis ke sheron mein kis ki baaten hain

phir jawabaat mil gae mujh ko

ab hansi aati hai sawalon par

aur tujh par bhi aur KHud par bhi

tujhe malum kya ki ek aamad

kitne jazbon se hamila ho kar

leT kar ek beswa ki tarah

kore kaghaz ke sard bistar par

wo harami kalam janti hai

jis pe fatwe faqih-e-shahr ke hain

jo KHudaon ko gali lagta hai

jis pe rajat-pasand kuDhte hain

jis pe jiddat-parast hanste hain

jis ka ThaTTha uDate hain launDe

jis ke fan ka zamana bit gaya

jis se nafrat hai ilm walon ko

jis pe KHud mujh ko ghussa aata hai

jise tu bhi samajh nahin pati

nam apna khurach ke jis par se

main ne raddi mein barha becha

aur cigarette KHaride apne liye

aur is dil ko aag mein phunka

jis ke jazbon se hamila ho kar

kore kaghaz ke sard bistar par

leT kar ek beswa ki tarah

meri qudrat ki shahkar aamad

wo harami kalam jannati hai

teri sochon ki sab KHabar hai mujhe

mere sheron mein kaun hai mat soch

teri paDhne ki umr hai laDki

aur phir sochne se kya hasil

barwar justuju hui bhi to kya

meri ghazlon mein tu hui bhi to kya