kis ko hai fursat-e-tajdid-e-mohabbat ai dost

na sunā mujh ko tū paiġhām-e-mohabbat ai dost

kis ko hai fursat-e-tajdīd-e-mohabbat ai dost

zindagī silsila-e-soz-e-jigar hai ai dost

aaj āfāt se bechain bashar hai ai dost

jis ko dekho vahī bā-dīda-e-tar hai ai dost

roz aatī hai na.ī ek qayāmat ai dost

kis ko hai fursat-e-tajdīd-e-mohabbat ai dost

qaht aur jang ne insāñ ko kiyā apnā shikār

nafsī-nafsī hai paḌī kaun ho kis kā ġham-ḳhvār

'arsa-e-dahr meñ har aan hai jiinā dushvār

zindagī aaj hai gahvāra-e-āfat ai dost

kis ko hai fursat-e-tajdīd-e-mohabbat ai dost

agle din vo na rahe aur vo zamāna na rahā

chaar tinkoñ kā bhī gulshan meñ Thikāna na rahā

koī sāthī na rahā apnā yagāna na rahā

na sunā tū abhī paiġhām-e-masarrat ai dost

kis ko hai fursat-e-tajdīd-e-mohabbat ai dost

dekh vo dekh sisaktī huī rūhoñ kī qatār

us taraf dekh vo lāshoñ kā lagā hai ambār

bhuuk se dekh vo be-tāb haiñ sīmīñ ruḳhsār

qaht ke bhes meñ aa.ī hai qayāmat ai dost

kis ko hai fursat-e-tajdīd-e-mohabbat ai dost

hai abhī teġh kī dhāroñ se guzarnā baaqī

aur nāmūs-e-vatan par bhī hai marnā baaqī

vaqt thoḌā hai bahut kaam hai karnā baaqī

de na mujh ko tū naved-e-shab-e-‘ishrat ai dost

kis ko hai fursat-e-tajdīd-e-mohabbat ai dost

mutma.in hone de aur dil ko sañbhal jaane de

jo ghaḌī aa.ī hai sar par use Tal jaane de

aur taqdīr-e-vatan ko bhī badal jaane de

na sunā tū abhī paiġhām-e-mohabbat ai dost

kis ko hai fursat-e-tajdīd-e-mohabbat ai dost

na suna mujh ko tu paigham-e-mohabbat ai dost

kis ko hai fursat-e-tajdid-e-mohabbat ai dost

zindagi silsila-e-soz-e-jigar hai ai dost

aaj aafat se bechain bashar hai ai dost

jis ko dekho wahi ba-dida-e-tar hai ai dost

roz aati hai nai ek qayamat ai dost

kis ko hai fursat-e-tajdid-e-mohabbat ai dost

qaht aur jang ne insan ko kiya apna shikar

nafsi-nafsi hai paDi kaun ho kis ka gham-KHwar

'arsa-e-dahr mein har aan hai jina dushwar

zindagi aaj hai gahwara-e-afat ai dost

kis ko hai fursat-e-tajdid-e-mohabbat ai dost

agle din wo na rahe aur wo zamana na raha

chaar tinkon ka bhi gulshan mein Thikana na raha

koi sathi na raha apna yagana na raha

na suna tu abhi paigham-e-masarrat ai dost

kis ko hai fursat-e-tajdid-e-mohabbat ai dost

dekh wo dekh sisakti hui ruhon ki qatar

us taraf dekh wo lashon ka laga hai ambar

bhuk se dekh wo be-tab hain simin ruKHsar

qaht ke bhes mein aai hai qayamat ai dost

kis ko hai fursat-e-tajdid-e-mohabbat ai dost

hai abhi tegh ki dhaaron se guzarna baqi

aur namus-e-watan par bhi hai marna baqi

waqt thoDa hai bahut kaam hai karna baqi

de na mujh ko tu nawed-e-shab-e-‘ishrat ai dost

kis ko hai fursat-e-tajdid-e-mohabbat ai dost

mutmain hone de aur dil ko sanbhal jaane de

jo ghaDi aai hai sar par use Tal jaane de

aur taqdir-e-watan ko bhi badal jaane de

na suna tu abhi paigham-e-mohabbat ai dost

kis ko hai fursat-e-tajdid-e-mohabbat ai dost