kis shan se jite the yahan KHwar hue kyun

'tāriq' kyā kabhī qaum kā nauha bhī likhoge

yā bas dar-e-daulat kā qasīda hī likhoge

angusht-numā.ī sadā aġhyār pe hogī

yā jurm kabhī koī tum apnā bhī likhoge

jo dil pe guzarte haiñ vo sadmāt likho ab

chhoḌo ye qasīda koī haq baat likho ab

kyuuñ apnī vafāoñ ke bharam TuuT rahe haiñ

kyuuñ ham pe hī ye zulm-o-sitam TuuT rahe haiñ

jis qaum kī mīrās the ye ilm-o-shujā.at

kyuuñ us pe hī shamshīr-o-qalam TuuT rahe haiñ

har zālim-o-zulmat ko haiñ matlūb hamī kyuuñ

sochā hai kabhī hote haiñ ma.atūb hamī kyuuñ

kuchh apnī tabāhī ke bhī asbāb likho ab

jis baab pe sharminda ho vo baab likho ab

maḳhdūsh haiñ kyuuñ mimbar-o-mehrāb likho ab

sone jo nahīñ dete haiñ vo ḳhvāb likho ab

sochā hai kabhī aaj ye hālat hai to kyuuñ hai

har-gām pe tahqīr hai zillat hai to kyuuñ hai

kal vaqt ke siine pe kaf-e-pā the hamāre

ye dasht-o-jabal aur ye dariyā the hamāre

ye saat samundar the ye sahrā the hamāre

qadmoñ tale mirrīḳh-o-surayyā the hamāre

tārīḳh faqat mahv-e-qasīda thī hamārī

girvīda-e-aḳhlāq-e-hamīda thī hamārī

ham hī to kabhī maut se the khelne vaale

the maqtal-o-zindāñ ke charāġhoñ ke ujāle

aur aaj ye jiine ke haiñ andāz nirāle

jaada hai na manzil hai na ab paaoñ meñ chhāle

ham apne zamīroñ kī tijārat meñ paḌe haiñ

kaasa liye bāzār-e-siyāsat meñ khaḌe haiñ

izzat ke sadāqat ke shahādat ke qasīde

aslāf ke kirdār kī azmat ke qasīde

bhūle hue baiThe haiñ shujā.at ke qasīde

ham paḌhne lage ahl-e-ra.ūnat ke qasīde

ab apnā zamīr apnā yaqīñ bech rahe haiñ

ham luqma-e-tar ke liye diiñ bech rahe haiñ

maqsūd jo ḳhush-nūdī-e-qātil hai hamārī

ham ḳhush haiñ ki kashtī sar-e-sāhil hai hamārī

uqbā kī tamannā kahāñ hāsil hai hamārī

kursī kī talab āḳhirī manzil hai hamārī

kis shaan se jiite the yahāñ ḳhaar hue kyuuñ

sochā hai kabhī hāshiya-bardār hue kyuuñ

'tariq' kya kabhi qaum ka nauha bhi likhoge

ya bas dar-e-daulat ka qasida hi likhoge

angusht-numai sada aghyar pe hogi

ya jurm kabhi koi tum apna bhi likhoge

jo dil pe guzarte hain wo sadmat likho ab

chhoDo ye qasida koi haq baat likho ab

kyun apni wafaon ke bharam TuT rahe hain

kyun hum pe hi ye zulm-o-sitam TuT rahe hain

jis qaum ki miras the ye ilm-o-shujaat

kyun us pe hi shamshir-o-qalam TuT rahe hain

har zalim-o-zulmat ko hain matlub hami kyun

socha hai kabhi hote hain matub hami kyun

kuchh apni tabahi ke bhi asbab likho ab

jis bab pe sharminda ho wo bab likho ab

maKHdush hain kyun mimbar-o-mehrab likho ab

sone jo nahin dete hain wo KHwab likho ab

socha hai kabhi aaj ye haalat hai to kyun hai

har-gam pe tahqir hai zillat hai to kyun hai

kal waqt ke sine pe kaf-e-pa the hamare

ye dasht-o-jabal aur ye dariya the hamare

ye sat samundar the ye sahra the hamare

qadmon tale mirriKH-o-surayya the hamare

tariKH faqat mahw-e-qasida thi hamari

girwida-e-aKHlaq-e-hamida thi hamari

hum hi to kabhi maut se the khelne wale

the maqtal-o-zindan ke charaghon ke ujale

aur aaj ye jine ke hain andaz nirale

jada hai na manzil hai na ab paon mein chhaale

hum apne zamiron ki tijarat mein paDe hain

kasa liye bazar-e-siyasat mein khaDe hain

izzat ke sadaqat ke shahadat ke qaside

aslaf ke kirdar ki azmat ke qaside

bhule hue baiThe hain shujaat ke qaside

hum paDhne lage ahl-e-raunat ke qaside

ab apna zamir apna yaqin bech rahe hain

hum luqma-e-tar ke liye din bech rahe hain

maqsud jo KHush-nudi-e-qatil hai hamari

hum KHush hain ki kashti sar-e-sahil hai hamari

uqba ki tamanna kahan hasil hai hamari

kursi ki talab aaKHiri manzil hai hamari

kis shan se jite the yahan KHar hue kyun

socha hai kabhi hashiya-bardar hue kyun