kisan

barahna jism pasīna meñ ġharq nange paañv

magar sukūn hai yuuñ dil meñ jaise ThanDī chhāñv

gehūñ ke khet se kuTiyā meñ apnī aayā hai

tasavvurāt kī duniyā meñ saath laayā hai

hai ik phaTī huī kambal ġharīb kāñdhoñ par

siyāh abr pe rah rah ke uTh rahī hai nazar

paḌā hai khet kā sāmān ek kone meñ

haiñ us kī ziist ke asrār pā ke khone meñ

nafas hai phūlī huī jaise phūñk bhaTTe kī

rakhī hai kaan pe biiḌī banā ke patte kī

lahū kī lahar sī hai mauj-zan pasīne meñ

baqā-e-dahr kā hai raaz us ke jiine meñ

har ek saañs hai us kī bahār-e-āzādī

ki us ġhulām kā dil hai dayār-e-āzādī

barahna jism pasina mein gharq nange panw

magar sukun hai yun dil mein jaise ThanDi chhanw

gehun ke khet se kuTiya mein apni aaya hai

tasawwuraat ki duniya mein sath laya hai

hai ek phaTi hui kambal gharib kandhon par

siyah abr pe rah rah ke uTh rahi hai nazar

paDa hai khet ka saman ek kone mein

hain us ki zist ke asrar pa ke khone mein

nafas hai phuli hui jaise phunk bhaTTe ki

rakhi hai kan pe biDi bana ke patte ki

lahu ki lahar si hai mauj-zan pasine mein

baqa-e-dahr ka hai raaz us ke jine mein

har ek sans hai us ki bahaar-e-azadi

ki us ghulam ka dil hai dayar-e-azadi