کسی بھی سمت چلا

کسی بھی سمت چلا فاصلے نہ ختم ہوئے

ہمیشہ بڑھتے رہے دھول اڑا کے آنکھوں میں

جسے قریب سمجھتا تھا دور ہوتا گیا

سرائے لگتی تھی اک دور کی عمارت تھی

وہاں پہنچ کے اتاروں گا بوجھ کندھوں سے

اور سوچا تھا اک غسل لے کر میں

فلک کو اوڑھ کے سو جاؤں گا شب میں

وہاں پہ پہنچا تو وہ ریت کے بگولے تھے

جو شہرتوں کی طرح آگے آگے چلتے تھے

نہ پانی غسل کو تھا نہ لیٹ جانے کو بستر

سرائے دور ہی ہوتی گئی میری

کسی بھی سمت چلا فاصلے نہ ختم ہوئے