kisi ke samajhdar hone tak

qabr kyā DhūñDnā

miT ga.e hoñge us ke nishāñ

kahīñ bhī jalā kar lagā duuñ agarbattiyāñ

muddatoñ baa'd bhī

vird karte hue sūra-e-fātiha kā vahī guuñj kānoñ meñ hai

tirā baap kyā roz piitā hai

uf

vo jo sharmindagī kā sabab ho bhalā us se kaisī mohabbat

aur vaise bhī

ek bachche kī nafrat se sachchā koī aur jazba nahīñ

dafn ke vaqt bhī to maiñ dil meñ kahīñ un se nārāz thā

magar aaj ḳhud jab maiñ us 'umr meñ huuñ

jo paapā kī shāyad rahī hogī tab

jab maiñ rūThā thā un se

mire dil meñ ehsās-e-jurm aur sharmindagī ke sivā kuchh nahīñ

aap sun to rahe haiñ na paapā

mu'āfī mujhe chāhiye

kyā ye mumkin hai

phir ḳhud se kahtā huuñ shāyad nahīñ

vo ga.e

koī ruktā nahīñ hai kisī ke samajhdār hone talak

sach kī tah meñ utarne ke laa.iq gunahgār hone talak

qabr kya DhunDna

miT gae honge us ke nishan

kahin bhi jala kar laga dun agarbattiyan

muddaton ba'd bhi

wird karte hue sura-e-fatiha ka wahi gunj kanon mein hai

tera bap kya roz pita hai

uf

wo jo sharmindagi ka sabab ho bhala us se kaisi mohabbat

aur waise bhi

ek bachche ki nafrat se sachcha koi aur jazba nahin

dafn ke waqt bhi to main dil mein kahin un se naraaz tha

magar aaj KHud jab main us 'umr mein hun

jo papa ki shayad rahi hogi tab

jab main ruTha tha un se

mere dil mein ehsas-e-jurm aur sharmindagi ke siwa kuchh nahin

aap sun to rahe hain na papa

mu'afi mujhe chahiye

kya ye mumkin hai

phir KHud se kahta hun shayad nahin

wo gae

koi rukta nahin hai kisi ke samajhdar hone talak

sach ki tah mein utarne ke laiq gunahgar hone talak