kisi ki sada

raat ke pur-kaif sannāTe meñ bansī kī sadā

chāñdnī ke sīm-gūñ shāne pe lahrātī huī

gūñjtī baḌhtī laraztī kohsāroñ ke qarīb

phailtī maidāñ meñ pagDanDī pe bal khātī huī

aa rahī hai is tarah jaise kisī kī yaad aa.e

niiñd meñ Duubī huī palkoñ ko uksātī huī

āsmānoñ meñ zamīñ kā giit lahrāne lagā

chhā gayā hai chāñd ke chehre pe ḳhiffat kā ġhubār

bazm-e-anjum kī har ek tanvīr dhundlī ho ga.ī

rakh diyā nāhīd ne jhuñjhlā ke hāthoñ se sitār

zarra zarra jhuum kar lene lagā añgḌā.iyāñ

kahkashāñ takne lagī hairat se sū-e-jū-e-bār

yuuñ fazāoñ meñ ravāñ hai ye sadā-e-dil-nashīñ

zehn-e-shā.ir meñ ho jaise ik achhūtā sā ḳhayāl

yā sahar ke sīm-gūñ ruḳhsār par pahlī kiran

surḳh hoñToñ se bichhā.e jis tarah bosoñ ke jaal

gaah thamtī gaah sannāTe kā siina chīrtī

yuuñ fazā meñ uTh ke ho jaatī hai maddham haa.e haa.e

shaam kī dhuñdhlāhaToñ meñ duur koī kārvāñ

kohsāroñ se utar kar jaise maidānoñ meñ aa.e

raat ke pur-kaif sannaTe mein bansi ki sada

chandni ke sim-gun shane pe lahraati hui

gunjti baDhti larazti kohsaron ke qarib

phailti maidan mein pagDanDi pe bal khati hui

aa rahi hai is tarah jaise kisi ki yaad aae

nind mein Dubi hui palkon ko uksati hui

aasmanon mein zamin ka git lahrane laga

chha gaya hai chand ke chehre pe KHiffat ka ghubar

bazm-e-anjum ki har ek tanwir dhundli ho gai

rakh diya nahid ne jhunjhla ke hathon se sitar

zarra zarra jhum kar lene laga angDaiyan

kahkashan takne lagi hairat se su-e-ju-e-bar

yun fazaon mein rawan hai ye sada-e-dil-nashin

zehn-e-shair mein ho jaise ek achhuta sa KHayal

ya sahar ke sim-gun ruKHsar par pahli kiran

surKH honTon se bichhae jis tarah boson ke jal

gah thamti gah sannaTe ka sina chirti

yun faza mein uTh ke ho jati hai maddham hae hae

sham ki dhundhlahaTon mein dur koi karwan

kohsaron se utar kar jaise maidanon mein aae