kisi ko udas dekh kar

tumheñ udaas sā paatā huuñ maiñ ka.ī din se

na jaane kaun se sadme uThā rahī ho tum

vo shoḳhiyāñ vo tabassum vo qahqahe na rahe

har ek chiiz ko hasrat se dekhtī ho tum

chhupā chhupā ke ḳhamoshī meñ apnī bechainī

ḳhud apne raaz kī tash.hīr ban ga.ī ho tum

merī umiid agar miT ga.ī to miTne do

umiid kyā hai bas ik pesh-o-pas hai kuchh bhī nahīñ

mirī hayāt kī ġhamgīniyoñ kā ġham na karo

ġham-e-hayāt ġham-e-yak-nafas hai kuchh bhī nahīñ

tum apne husn kī ra.anā.iyoñ pe rahm karo

vafā fareb hai tūl-e-havas hai kuchh bhī nahīñ

mujhe tumhāre taġhāful se kyuuñ shikāyat ho

mirī fanā mire ehsās kā taqāzā hai

maiñ jāntā huuñ ki duniyā kā ḳhauf hai tum ko

mujhe ḳhabar hai ye duniyā ajiib duniyā hai

yahāñ hayāt ke parde meñ maut paltī hai

shikast-e-sāz kī āvāz rūh-e-naġhma hai

mujhe tumhārī judā.ī kā koī rañj nahīñ

mire ḳhayāl kī duniyā meñ mere paas ho tum

ye tum ne Thiik kahā hai tumheñ milā na karūñ

magar mujhe ye batā do ki kyuuñ udaas ho tum

ḳhafā na honā mirī jur.at-e-taḳhātub par

tumheñ ḳhabar hai mirī zindagī kī aas ho tum

mirā to kuchh bhī nahīñ hai maiñ ro ke jī lūñgā

magar ḳhudā ke liye tum asīr-e-ġham na raho

huā hī kyā jo zamāne ne tum ko chhīn liyā

yahāñ pe kaun huā hai kisī kā socho to

mujhe qasam hai mirī dukh-bharī javānī kī

maiñ ḳhush huuñ merī mohabbat ke phuul Thukrā do

maiñ apnī ruuh kī har ik ḳhushī miTā lūñgā

magar tumhārī masarrat miTā nahīñ saktā

maiñ ḳhud ko maut ke hāthoñ meñ sauñp saktā huuñ

magar ye bār-e-masā.ib uThā nahīñ saktā

tumhāre ġham ke sivā aur bhī to ġham haiñ mujhe

najāt jin se maiñ ik lahza pā nahīñ saktā

ye ūñche ūñche makānoñ kī DevḌhiyoñ ke tale

har ek gaam pe bhūke bhikāriyoñ kī sadā

har ek ghar meñ hai aflās aur bhuuk kā shor

har ek samt ye insāniyat kī āh-o-bukā

ye kār-ḳhānoñ meñ lohe kā shor-o-ġhul jis meñ

hai dafn lākhoñ ġharīboñ kī ruuh kā naġhma

ye shāh-rāhoñ pe rañgīn sāḌiyoñ kī jhalak

ye jhoñpaḌoñ meñ ġharīboñ ke be-kafan lāshe

ye māl-road pe caroñ kī rel-pel kā shor

ye pTriyoñ pe ġharīboñ ke zard-rū bachche

galī galī meñ ye bikte hue javāñ chehre

husain ā.ankhoñ meñ afsurdagī sī chhā.ī huī

ye jañg aur ye mere vatan ke shoḳh javāñ

ḳharīdī jaatī haiñ uThtī javāniyāñ jin kī

ye baat baat pe qānūn o zābte kī giraft

ye zillateñ ye ġhulāmī ye daur-e-majbūrī

ye ġham bahut haiñ mirī zindagī miTāne ko

udaas rah ke mire dil ko aur rañj na do

tumhein udas sa pata hun main kai din se

na jaane kaun se sadme uTha rahi ho tum

wo shoKHiyan wo tabassum wo qahqahe na rahe

har ek chiz ko hasrat se dekhti ho tum

chhupa chhupa ke KHamoshi mein apni bechaini

KHud apne raaz ki tashhir ban gai ho tum

meri umid agar miT gai to miTne do

umid kya hai bas ek pesh-o-pas hai kuchh bhi nahin

meri hayat ki ghamginiyon ka gham na karo

gham-e-hayat gham-e-yak-nafas hai kuchh bhi nahin

tum apne husn ki ranaiyon pe rahm karo

wafa fareb hai tul-e-hawas hai kuchh bhi nahin

mujhe tumhaare taghaful se kyun shikayat ho

meri fana mere ehsas ka taqaza hai

main jaanta hun ki duniya ka KHauf hai tum ko

mujhe KHabar hai ye duniya ajib duniya hai

yahan hayat ke parde mein maut palti hai

shikast-e-saz ki aawaz ruh-e-naghma hai

mujhe tumhaari judai ka koi ranj nahin

mere KHayal ki duniya mein mere pas ho tum

ye tum ne Thik kaha hai tumhein mila na karun

magar mujhe ye bata do ki kyun udas ho tum

KHafa na hona meri jurat-e-taKHatub par

tumhein KHabar hai meri zindagi ki aas ho tum

mera to kuchh bhi nahin hai main ro ke ji lunga

magar KHuda ke liye tum asir-e-gham na raho

hua hi kya jo zamane ne tum ko chhin liya

yahan pe kaun hua hai kisi ka socho to

mujhe qasam hai meri dukh-bhari jawani ki

main KHush hun meri mohabbat ke phul Thukra do

main apni ruh ki har ek KHushi miTa lunga

magar tumhaari masarrat miTa nahin sakta

main KHud ko maut ke hathon mein saunp sakta hun

magar ye bar-e-masaib uTha nahin sakta

tumhaare gham ke siwa aur bhi to gham hain mujhe

najat jin se main ek lahza pa nahin sakta

ye unche unche makanon ki DewDhiyon ke tale

har ek gam pe bhuke bhikariyon ki sada

har ek ghar mein hai aflas aur bhuk ka shor

har ek samt ye insaniyat ki aah-o-buka

ye kar-KHanon mein lohe ka shor-o-ghul jis mein

hai dafn lakhon gharibon ki ruh ka naghma

ye shah-rahon pe rangin saDiyon ki jhalak

ye jhonpaDon mein gharibon ke be-kafan lashe

ye mal-road pe caron ki rel-pel ka shor

ye pTriyon pe gharibon ke zard-ru bachche

gali gali mein ye bikte hue jawan chehre

husain aaankhon mein afsurdagi si chhai hui

ye jang aur ye mere watan ke shoKH jawan

KHaridi jati hain uThti jawaniyan jin ki

ye baat baat pe qanun o zabte ki giraft

ye zillaten ye ghulami ye daur-e-majburi

ye gham bahut hain meri zindagi miTane ko

udas rah ke mere dil ko aur ranj na do