kiya kya ai sada tu ne bata aa kar zamane mein

kiyā kyā ai sadā tū ne batā aa kar zamāne meñ

guzārī zindagī saarī faqat pīne-pilāne meñ

agar thā phuul to kyoñ na bikherī har taraf ḳhushbū

agar ḳhas thā to kaam aatā kisī ke āshiyāne meñ

tujhe jalnā thā to jaltā charāġh-e-rāh ban kar tū

milā kyā hai butoñ ke 'ishq meñ dil ko jalāne meñ

kabhī poñchhe haiñ kyā tū ne kisī kī aañkh ke aañsū

rahā mashġhūl dāman kī safedī ko bachāne meñ

gila kartā rahā tū kātib-e-taqdīr se nāhaq

milā hai jo tujhe kitnoñ ko miltā hai zamāne meñ

farā.ez se sadā apne rahā tū be-ḳhabar lekin

kabhī chhoḌī na tū ne kasr haq apnā jatāne meñ

batā kis kaam ā.eñgī tirī ye daulateñ saarī

gañvā.ī zindagī apnī jinheñ tū ne juTāne meñ

kiye sau paap jin ke vāste nāhaq 'sadā' tū ne

hai kitnī koft dekh un ko tirī mayyat uThāne meñ

kiya kya ai sada tu ne bata aa kar zamane mein

guzari zindagi sari faqat pine-pilane mein

agar tha phul to kyon na bikheri har taraf KHushbu

agar KHas tha to kaam aata kisi ke aashiyane mein

tujhe jalna tha to jalta charagh-e-rah ban kar tu

mila kya hai buton ke 'ishq mein dil ko jalane mein

kabhi ponchhe hain kya tu ne kisi ki aankh ke aansu

raha mashghul daman ki safedi ko bachane mein

gila karta raha tu katib-e-taqdir se nahaq

mila hai jo tujhe kitnon ko milta hai zamane mein

faraez se sada apne raha tu be-KHabar lekin

kabhi chhoDi na tu ne kasr haq apna jatane mein

bata kis kaam aaengi teri ye daulaten sari

ganwai zindagi apni jinhen tu ne juTane mein

kiye sau pap jin ke waste nahaq 'sada' tu ne

hai kitni koft dekh un ko teri mayyat uThane mein