کیا کیا اے صداؔ تو نے بتا آ کر زمانے میں

کیا کیا اے سدا تو نے بتا آ کر زمانے میں

گزاری زندگی ساری فقط پینے پلانے میں

اگر تھا پھول تو کیوں نہ بکھیری ہر طرف خوشبو

اگر خس تھا تو کام آتا کسی کے آشیانے میں

تجھے جلنا تھا تو جلتا چراغ راہ بن کر تو

ملا کیا ہے بتوں کے عشق میں دل کو جلانے میں

کبھی پونچھے ہیں کیا تو نے کسی کی آنکھ کے آنسو

رہا مشغول دامن کی سفیدی کو بچانے میں

گلہ کرتا رہا تو کاتب تقدیر سے ناحق

ملا ہے جو تجھے کتنوں کو ملتا ہے زمانے میں

فرائض سے سدا اپنے رہا تو بے خبر لیکن

کبھی چھوڑی نہ تو نے کسر حق اپنا جتانے میں

بتا کس کام آئیں گی تری یہ دولتیں ساری

گنوائی زندگی اپنی جنہیں تو نے جٹانے میں

کئے سو پاپ جن کے واسطے ناحق صداؔ تو نے

ہے کتنی کوفت دیکھ ان کو تری میت اٹھانے میں