koh-e-nida

sub.h-savere

ek laraztī kāñptī sī āvāz aatī hai

sone vālo! tum mālik ko bhuul ga.e ho

tum mālik ko bhuul ga.e ho

phir chamkīlī mil kā sā.eran

ek ġhalīz Darāne vaalī tund sadā ke ruup meñ Dhal kar

dīvāroñ se Takrātā hai

aur galiyoñ ke

tañg añdhere baaḌe meñ kohrām machā kar

bheḌoñ ke galle ko haañk ke le jaatā hai

phir engine kī barham siiTī

meḳh sī ban kar mere kaan meñ gaḌ jaatī hai

aur shab bhar kī nuchī huī ik rail kī bogī

apnī kalā.ī engine ke panje meñ de kar

chal paḌtī hai

phir ik dam ik sannāTā sā chhā jaatā hai

aur maiñ ghaḌī kī zālim sūiyoñ kī Tik Tik meñ

din ke zard pahāḌ pe chaḌhne lagtā huuñ

subh-sawere

ek larazti kanpti si aawaz aati hai

sone walo! tum malik ko bhul gae ho

tum malik ko bhul gae ho

phir chamkili mil ka saeran

ek ghaliz Darane wali tund sada ke rup mein Dhal kar

diwaron se Takraata hai

aur galiyon ke

tang andhere baDe mein kohram macha kar

bheDon ke galle ko hank ke le jata hai

phir engine ki barham siTi

meKH si ban kar mere kan mein gaD jati hai

aur shab bhar ki nuchi hui ek rail ki bogi

apni kalai engine ke panje mein de kar

chal paDti hai

phir ek dam ek sannaTa sa chha jata hai

aur main ghaDi ki zalim suiyon ki Tik Tik mein

din ke zard pahaD pe chaDhne lagta hun