kohar ke us par

kohar ke paar

aur duur kahīñ

kahkashāoñ kī pyaar bastī meñ

chāñd tāroñ kī phailī duniyā meñ

bādaloñ ke ravāñ jazīroñ meñ

kaun hogā jo rah rahā hogā

garche kuchh bhī nazar nahīñ aatā

hameñ phir bhī talāsh karnā hai

jo ki terī hasīn āñkhoñ meñ

jo ki mere bhī qalb-e-muztar meñ

roz jiitā hai roz martā hai

vahī ehsās kā ghanā saaya

zindagī ke tavīl raste par

roz ghaTtā hai roz baḌhtā hai

koī mere qarīñ nahīñ aatā

merī āñkheñ sarāb bastī kī

aise lagtā hai ho ga.iiñ aadī

phir mire dil ke phaile sahrā meñ

ek aahū ne apne zaḳhmoñ se

mausamoñ ke nahīf hāthoñ se

jañgaloñ ko payām bhejā hai

ki ye phailī huī siyah chādar

sirf vahm-o-gumāñ hai kuchh bhī nahīñ

aa mire saath ai mire hamdam

ham bhī is zau-fishāñ sitāre kī

chand kirnoñ se ik ziyā le kar

kohar ke paar aao

jā nikleñ

DhūñD leñ us safed bastī ko

jo hameñ ḳhulq-o-pyār bhī degī

chain-o-sukh bhī qarār bhī degī

ujle sach kā nikhār bhī degī

kohar ke par

aur dur kahin

kahkashaon ki pyar basti mein

chand taron ki phaili duniya mein

baadalon ke rawan jaziron mein

kaun hoga jo rah raha hoga

garche kuchh bhi nazar nahin aata

hamein phir bhi talash karna hai

jo ki teri hasin aankhon mein

jo ki mere bhi qalb-e-muztar mein

roz jita hai roz marta hai

wahi ehsas ka ghana saya

zindagi ke tawil raste par

roz ghaTta hai roz baDhta hai

koi mere qarin nahin aata

meri aankhen sarab basti ki

aise lagta hai ho gain aadi

phir mere dil ke phaile sahra mein

ek aahu ne apne zaKHmon se

mausamon ke nahif hathon se

jangalon ko payam bheja hai

ki ye phaili hui siyah chadar

sirf wahm-o-guman hai kuchh bhi nahin

aa mere sath ai mere hamdam

hum bhi is zau-fishan sitare ki

chand kirnon se ek ziya le kar

kohar ke par aao

ja niklen

DhunD len us safed basti ko

jo hamein KHulq-o-pyar bhi degi

chain-o-sukh bhi qarar bhi degi

ujle sach ka nikhaar bhi degi