kohre ka khet

vo sard raat jabki safar kar rahā thā maiñ

rañgīniyoñ se zarf-e-nazar bhar rahā thā maiñ

tezī se jañgaloñ meñ uḌī jā rahī thī rail

ḳhvābīda kā.enāt ko chauñkā rahī thī rail

muḌtī uchhaltī kāñptī chiñghāḌtī huī

kohre kī vo dabīz ridā phāḌtī huī

pahiyoñ kī gardishoñ meñ machaltī thī rāgnī

aahan se aag ban ke nikaltī thī rāgnī

pahuñchī jidhar zamīñ kā kaleja hilā diyā

dāman meñ tīrgī ke garebāñ banā diyā

jhoñke havā ke barf bichhāte the raah meñ

jalve samā rahe the laraz kar nigāh meñ

dhoke se chhū ga.iiñ jo kahīñ sard uñgliyāñ

bichchhū sā Dañk mārne lagtī thiiñ khiḌkiyāñ

pichhle pahar kā narm dhuñdlakā thā pur-fishāñ

māyūsiyoñ meñ jaise umīdoñ kā kārvāñ

be-nūr ho ke Dūbne vaalā thā māhtāb

kohre meñ khup ga.ī thī sitāroñ kī āb-o-tāb

qabze se tīrgī ke sahar chhūTne ko thī

mashriq ke hāshiye meñ kiran phūTne ko thī

kohre meñ thā Dhake hue bāġhoñ kā ye samāñ

jis tarah zer-e-āb jhalaktī hoñ bastiyāñ

bhīgī huī zamīñ thī namī sī fazā meñ thī

ik kisht-e-barf thī ki muallaq havā meñ thī

jaadū ke farsh sehr ke sab saqf-o-bām the

dosh-e-havā pe pariyoñ ke sīmīñ ḳhiyām the

thī ThanDe ThanDe nuur meñ khoī huī nigāh

Dhal kar fazā meñ aa.ī thī hūroñ kī ḳhvāb-gāh

ban ban ke phen sū-e-falak dekhtā huā

dariyā chalā thā chhoḌ ke dāman zamīn kā

is shabnamī dhundalke meñ bagule the yuuñ ravāñ

maujoñ pe mast ho ke chaleñ jaise machhliyāñ

Daalā kabhī fazāoñ meñ ḳhat kho ga.e kabhī

jhalke kabhī ufuq meñ nihāñ ho ga.e kabhī

engine se uḌ ke kāñptā phirtā thā yuuñ dhuāñ

letā thā lahr khet meñ kohre ke āsmāñ

us vaqt kyā thā ruuh pe sadma na pūchhiye

yaad aa rahā thā kis se bichhaḌnā na pūchhiye

dil meñ kuchh aise ghaav the tīr-e-malāl ke

ro ro diyā thā khiḌkī se gardan nikāl ke

wo sard raat jabki safar kar raha tha main

ranginiyon se zarf-e-nazar bhar raha tha main

tezi se jangalon mein uDi ja rahi thi rail

KHwabida kaenat ko chaunka rahi thi rail

muDti uchhalti kanpti chinghaDti hui

kohre ki wo dabiz rida phaDti hui

pahiyon ki gardishon mein machalti thi ragni

aahan se aag ban ke nikalti thi ragni

pahunchi jidhar zamin ka kaleja hila diya

daman mein tirgi ke gareban bana diya

jhonke hawa ke barf bichhate the rah mein

jalwe sama rahe the laraz kar nigah mein

dhoke se chhu gain jo kahin sard ungliyan

bichchhu sa Dank marne lagti thin khiDkiyan

pichhle pahar ka narm dhundlaka tha pur-fishan

mayusiyon mein jaise umidon ka karwan

be-nur ho ke Dubne wala tha mahtab

kohre mein khup gai thi sitaron ki aab-o-tab

qabze se tirgi ke sahar chhuTne ko thi

mashriq ke hashiye mein kiran phuTne ko thi

kohre mein tha Dhake hue baghon ka ye saman

jis tarah zer-e-ab jhalakti hon bastiyan

bhigi hui zamin thi nami si faza mein thi

ek kisht-e-barf thi ki muallaq hawa mein thi

jadu ke farsh sehr ke sab saqf-o-baam the

dosh-e-hawa pe pariyon ke simin KHiyam the

thi ThanDe ThanDe nur mein khoi hui nigah

Dhal kar faza mein aai thi huron ki KHwab-gah

ban ban ke phen su-e-falak dekhta hua

dariya chala tha chhoD ke daman zamin ka

is shabnami dhundalke mein bagule the yun rawan

maujon pe mast ho ke chalen jaise machhliyan

Dala kabhi fazaon mein KHat kho gae kabhi

jhalke kabhi ufuq mein nihan ho gae kabhi

engine se uD ke kanpta phirta tha yun dhuan

leta tha lahr khet mein kohre ke aasman

us waqt kya tha ruh pe sadma na puchhiye

yaad aa raha tha kis se bichhaDna na puchhiye

dil mein kuchh aise ghaw the tir-e-malal ke

ro ro diya tha khiDki se gardan nikal ke