koi basti ki mujh mein basti hai

maiñ āḳhir kis kī jāgat jāgtā huuñ

papoToñ meñ ye kis paanī kā namkin zā.iqa hai

mirī putlī meñ kis kī raat hai

aur qarniya meñ kaun se yug kā saverā hai

ye din bhar kaun

mizhgānī kivāḌoñ ko musalsal kholtā aur band kartā hai

mirī tār-e-nazar par baiTh kar

āḳhir zamāne meñ nazar kis kī utartī hai

maiñ āñkhoñ se ye kis manzar ke andar bhāgtā huuñ

maiñ āḳhir kis kī jāgat jāgtā huuñ?

bhalā maiñ kis kā sonā so rahā huuñ

ye reg-ḳhvāb par bante bigaḌte kyā nishāñ haiñ

mire andar to jitne qāfile chalte haiñ

saare ajnabī haiñ

maiñ har ik ḳhvāb meñ koī shanāsā DhūñDtā huuñ

ye kaisī aurteñ haiñ

jo sar meñ ret kā afshāñ bhare

mujh ko jakaḌtī haiñ

jo bād-az-iḳhtalāt aahoñ se chīḳhoñ se pighal kar

ret ho jaatī haiñ giilī ret meñ!!

ye bachche kis sadī ke haiñ

jo apne qahqaha-āvar khilaune mere hāthoñ meñ

thamā kar bhaag jaate haiñ

ye kis mābad ke jogī haiñ

sahīfoñ kī zabāñ meñ bolte haiñ

in ke farġhul phaḌ.phaḌāte haiñ

havā meñ riish uḌtī hai

ye maiñ kis kī ḳhushī ko hañs rahā huuñ

kis kā ronā ro rahā huuñ

bhalā maiñ kis kā sonā so rahā huuñ?

maiñ āḳhir kis kā jiinā jī rahā huuñ

maiñ sahrā kā shajar huuñ

jis kī shāḳheñ ghoñsloñ se jhuk ga.ī haiñ

kirā.e kā makāñ huuñ

jis ke kamroñ meñ parā.e log rahte haiñ

farāz-e-koh par koī purānā ġhaar huuñ maiñ

havā se gūñjtā sāya-zada vīrāñ khañDar huuñ

kabhī huuñ īstāda aur kabhī mismār huuñ maiñ

fasīl-e-shahr hoñ yā sāya-e-dīvār huuñ maiñ

mire andar se hī koī mujhe batlā.e

maiñ kyā huuñ?

mire ḳhaliyoñ ke giile markazoñ meñ band

D-n-a mire maañ baap kā hai

jo is ke gird paanī hai

vo kis bechain sayyāre ke sāgar se uThā hai

maiñ kis ko bhogtā huuñ

ye āḳhir kaun mujh meñ gūñjtā hai

sansanātā hai

maiñ āḳhir kis kā honā ho rahā huuñ

main aaKHir kis ki jagat jagta hun

papoTon mein ye kis pani ka namkin zaiqa hai

meri putli mein kis ki raat hai

aur qarniya mein kaun se yug ka sawera hai

ye din bhar kaun

mizhgani kiwaDon ko musalsal kholta aur band karta hai

meri tar-e-nazar par baiTh kar

aaKHir zamane mein nazar kis ki utarti hai

main aankhon se ye kis manzar ke andar bhagta hun

main aaKHir kis ki jagat jagta hun?

bhala main kis ka sona so raha hun

ye reg-KHwab par bante bigaDte kya nishan hain

mere andar to jitne qafile chalte hain

sare ajnabi hain

main har ek KHwab mein koi shanasa DhunDta hun

ye kaisi aurten hain

jo sar mein ret ka afshan bhare

mujh ko jakaDti hain

jo baad-az-iKHtalat aahon se chiKHon se pighal kar

ret ho jati hain gili ret mein!!

ye bachche kis sadi ke hain

jo apne qahqaha-awar khilaune mere hathon mein

thama kar bhag jate hain

ye kis mabad ke jogi hain

sahifon ki zaban mein bolte hain

in ke farghul phaDphaDate hain

hawa mein rish uDti hai

ye main kis ki KHushi ko hans raha hun

kis ka rona ro raha hun

bhala main kis ka sona so raha hun?

main aaKHir kis ka jina ji raha hun

main sahra ka shajar hun

jis ki shaKHen ghonslon se jhuk gai hain

kirae ka makan hun

jis ke kamron mein parae log rahte hain

faraaz-e-koh par koi purana ghaar hun main

hawa se gunjta saya-zada viran khanDar hun

kabhi hun istada aur kabhi mismar hun main

fasil-e-shahr hon ya saya-e-diwar hun main

mere andar se hi koi mujhe batlae

main kya hun?

mere KHaliyon ke gile markazon mein band

D-n-a mere man bap ka hai

jo is ke gird pani hai

wo kis bechain sayyare ke sagar se uTha hai

main kis ko bhogta hun

ye aaKHir kaun mujh mein gunjta hai

sansanata hai

main aaKHir kis ka hona ho raha hun